ГукIэгъуныгъэ зыхэлъхэм къяджэх

Мэзаем и 15-р — адэбз уз зиIэ кIэлэцIыкIухэм я Дунэе маф. 2001-рэ илъэсым къыщегъэжьагъэу сабый сымаджэ зиIэ ны-тыхэм я Дунэе конфедерацие игукъэкIыкIэ мы мафэр мэфэпчъым къыщыхагъэщыгъ.

2usKyZeAn1I

Адыгэ республикэ клиническэ онкодиспансерым волонтерхэр игъусэхэу шIушIэ Iоф­тхьабзэу «Доброе сердце» зы­фиIорэр илъэс къэс мы мафэм ехъулIэу зэхещэ.

ДжэгукIэ зэфэшъхьафхэмкIэ, зэнэкъокъу гъэшIэгъонхэмкIэ, шIухьафтынхэмкIэ кIэлэцIы­кIу­хэр агъэгушIох. МэфэкI Iоф­тхьабзэхэм къякIолIэн зымы­лъэкIыгъэ сабыйхэм яшIухьаф­тынхэр афащэжьых. «Доброе сердце» зыфиIорэ Iофтхьабзэм изэхэщакIохэм сыдигъуи Iэпы­Iэгъу къафэхъух Мыекъопэ медицинэ колледжым икIэлэ­егъаджэхэмрэ истудентхэмрэ.

Мы мафэхэм Джэджэ районым щыщ кIэлэцIыкIухэм шIухьафтынхэр афащэжьыгъэх. Мэзаем и 12-м Мыекъопэ медицинэ колледжым шIушIэ ермэлыкъ щыкIуагъ. Студентхэм гъомылапхъэу ежь-ежьырэу ашIи колледжым щаща­гъэхэм къакIэкIогъэ ахъщэр (сомэ мин 15 мэхъу) адэбз уз зиIэ кIэлэцIыкIухэм мэфэкI шIыкIэм тетэу аратыжьыгъ. ЗэкIэмкIи сомэ мин 40 аугъо­игъ, ахэри сабыйхэм афагъэзэжьыщтых. Илъэсым къыщегъэ­жьагъэу 17-м нэс зыныбжь кIэлэцIыкIухэу адэбз уз зиIэу Адыгеим исыр нэбгырэ 50 мэхъу.

— Адыгэ республикэ клиническэ онкодиспансерым ишIу­шIэ Iофтхьабзэу «Доброе сердце» зыфиIорэм илъэсым мэфэ 365-рэ, чэщ-зымафэм сыхьат 24-рэ Iоф ешIэ. Тэри тисабыйхэри сыд фэдэ IэпыIэгъуи ты­щэ­гушIукIы. Лъэпкъ музеир, Кавказ­скэ биосфернэ заповедникыр, Лэ­гъо-Накъэ кIэ­лэ­цIы­кIухэм къап­лъыхьэхэ ашIо­игъу. Ахэм ящыIэ­ныгъэ на­хьышIу зышIын зылъэкIы­щтыр гъунэнчъ, — къаIуагъ акцием изэхэщакIохэм.

Сабый сымаджэхэм IэпыIэгъу афэхъу зышIоигъохэм онкодиспансерым испециалистхэр телефонхэу 8(8772)54-47-96-м, 8(903)466-03-58-м теонхэу къя­джэх.

(Тикорр.).