Зэтыгъо къэралыгъо ушэтыныр шапхъэхэм адиштэу, зэрифэшъуашэу зэхэщэгъэнымкIэ мэхьанэшхо зиIэр кIэлэеджакIохэм ахэтыщт кIэлэегъаджэхэм, лъыплъакIохэм якъыхэхын ыкIи ахэм яегъэджэн. Адыгэ Республикэм гъэсэныгъэмрэ шIэныгъэмрэкIэ и Министерствэ мы упчIэр мызэу, мытIоу къыIэтыгъ, зэхэсыгъо зэфэшъхьафхэм ащытегущыIагъэх.
Мы илъэсым предметхэмкIэ комиссиехэм ахэтыщтхэм яегъэджэн мэзаем и 8-м рагъэжьагъ. ШIэныгъэхэм зыщахагъэхъорэ Адыгэ республикэ институтым зэхищэгъэ семинарымкIэ ар аублагъ.
Iофтхьабзэр къызэIуихыгъ АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Надежда Кабановам. Къэралыгъо кIэух аттестациер мы илъэсым республикэм зэрэщыкIощтым ар лъыплъэнэу агъэнэфагъ. Джэуап игъэкIотыгъэ зиIэн фэе IофшIэнхэр ауплъэкIухэ зыхъукIэ, предметхэмкIэ комиссиехэм яIофшIэн идэгъугъэ къэнафэ.
— Шапхъэу щыIэхэм ялъытыгъэу, ушэтыным щагъэцэкIэгъэ IофшIэнхэм уасэ язытыщт экспертхэм тренинг тедзэхэр афызэхэщэгъэнхэ фаеу дгъэнэфагъэ, — къыIуагъ Надежда Кабановам.
Къэралыгъо аттестационнэ къулыкъум къызэрэщаIуагъэмкIэ, кандидатхэм яегъэджэн фэгъэзэгъэщтхэ предметнэ комиссиехэм ятхьаматэхэр арых Iофтхьабзэм пэщэныгъэ дызезыхьащтхэр, ар 2016-рэ илъэсым мэзаем рагъэжьагъ. Ахэм апае сыхъат 36-м телъытэгъэ курсхэр афызэхащэщтых, къэралыгъо зэфэхьысыжь аттестацием хэлажьэхэрэм къатыщт игъэкIотыгъэ джэуапхэм уасэ зэрафашIыщт практиче-скэ егъэджэнхэри ащ хэхьащтых.
(Тикорр.).