ТIопсэ районым щыпсэурэ ныбжьыкIэхэм спортыр якIас. ИкIыгъэ илъэсым спортымкIэ ашIыгъэ зэфэхьысыжьхэм къызэрагъэлъэгъуагъэмкIэ, дышъэм, тыжьыным ахэшIыкIыгъэхэу спортсмен ныбжьыкIэхэм медаль 640-рэ зэнэкъокъу зэфэшъхьафхэм къащахьыгъ.
Ащ нэмыкIэу, 2015-рэ илъэсым нэбгырэ минитIум ехъумэ спортымкIэ разрядхэр къазэрафагъэшъошагъэхэр район администрацием физкультурэмрэ спортымрэкIэ иотдел ипащэ къыIуагъ. Ахэм ащыщэу нэбгыри 5-р спортымкIэ мастер хъугъэх, 27-р мастер хъунхэмкIэ кандидатых, нэбгырэ 12-м спортымкIэ апэрэ разрядхэр къалэжьыгъэх.
Медаль 55-рэ дунэе ыкIи урысые зэнэкъокъу зэфэшъхьафхэм къащыдахыгъэх. Ахэр къэзыхьыгъэхэ дзюдоистхэм ащыщых Нэгъуцу Казбек, Михаил Игольниковыр (янэ адыгэ, псэупIэу Новомихайловскэм дэс), АкIэгъухэу Зауррэ Максимрэ, ХъорэлI Богдан, нэмыкIхэри.
Спорт лъэпкъ зэфэшъхьафхэмкIэ ныбжьыкIэхэр зыгъэсэхэрэ тренерхэми ягугъу къэпшIынэу атефэ. Ахэр Ныбэ Джамболэт, Нэгъуцу Джамболэт, Шъхьэлэхъо Аслъан, Шъхьэлэхъо Заур, Мэфэгъэл Юсыф, нэмыкIхэри.
ИкIыгъэ илъэсым фэдэу, ТIопсэ районым испортсмен ныбжьыкIэхэм ягъэхъагъэхэм джыри ахагъахъо. БэмышIэу къалэу Мыекъуапэ Урысыем и Къыблэ федеральнэ шъолъыр дзэюдомкIэ зэнэкъокъухэу щыкIуагъэхэм медаль 11 къащахьыгъ, спортсменэу къекIолIэгъагъэхэм зэкIэми анахь дэгъоу зыкъагъэлъэгъуагъ, апэрэ чIыпIэри аубытыгъ.
Ныбэ Анзор.