«ЦыхьэшIэгъу телефоным» Iоф ешIэ

Зэрэ Урысыеу номерэу 8-800-2000-122-р зиIэ кIэлэцIыкIу «цыхьэ­шIэгъу телефоным» илъэси 4 хъугъэ Адыгеим Iоф зыщишIэрэр.

Адыгэ Республикэм Iоф­шIэ­нымкIэ ыкIи социальнэ хэхъо­ныгъэмкIэ и Министерствэ къы­зэритыгъэмкIэ, унагъом ыкIи са­быим ящыкIэгъэ социальнэ-психологическэ IэпыIэгъур игъом специалистхэм арагъэгъо­ты­ным­кIэ мы кIэлэцIыкIу «цыхьэ­шIэ­гъу телефоныр» анахь шIы­кIакIэхэм ащыщ. Лъэныкъуи­тIумэ атегъэпсыкIыгъэу Iоф ешIэ — ыпкIэ хэмылъэу ыкIи шъэфыгъэ хэлъэу.

Джырэ уахътэ республикэм иучреждении 4 мы телефон номерым епхыгъэх.

2015-рэ илъэсым мы телефоным нэбгырэ 1798-рэ къытеуагъ. Ар 2014-рэ илъэсым елъытыгъэмэ, 530-кIэ нахьыб. Анахьыбэу закъыфэзгъазэхэрэр кIэлэцIыкIухэр ыкIи Iэта­хъохэр ары (процент 70-рэ). КIэ­лэцIыкIу зыпIоу ныбжь зиIэу къытеуагъэр процент 18 мэхъу.

Министерствэм къызэри­ты­гъэм­кIэ, зыхэр егъэгумэкIых зэ­лэгъу кIэлэцIыкIухэм азыфагу зэгурымыIоныгъэу къита­джэрэм (445-рэ), адрэхэр — кIэлэцIыкIухэмрэ ны-тыхэмрэ язэфыщытыкI (403-рэ), сабыир зыхэт илэгъухэр жъалымагъэ хэлъэу къызэрэдэзекIохэрэр (312-рэ). ЗыукIыжьыным епхы­гъэу телефоным нэбгырэ 50 къытеуагъ, ахэм ащыщэу 39-р кIэлэцIыкIух.

Джырэ лъэхъан «цыхьэшIэгъу телефоныр» сабыйхэмкIэ амалышIоу щыт. Зыщыфаем игу­къаохэр, зэмызэгъыхэрэр специалистхэм афиIуатэмэ, ищы­кIэгъэ психологическэ Iэ­пыIэгъур ыгъотын елъэкIы. А уахътэм ыгу цIыкIу ихъыкIы­щтыгъэ «бырсырхэр» щыгъэзыягъэхэ мэхъу.

Iэшъынэ Сусан.