ТибэнакIохэм тяжэ

ТелефонкIэ къатыгъ. Урысыем дзюдомкIэ изэIукIэ­гъухэр мэзаем и 11 — 13-м Новосибирскэ щыкIощтых. Илъэс 18-м нэс зыныбжь кIалэхэмрэ пшъашъэхэмрэ бэнэпIэ алырэгъум щызэнэкъокъущтых.

DSC_0800Адыгэ Республикэм дзюдомкIэ икIэлэцIыкIу-ныбжьыкIэ спорт еджапIэу Кобл Якъубэ ыцIэкIэ щытым идиректорэу, спортымкIэ дунэе класс зиIэ мастерэу КIое Хьазрэт тибэнакIохэм япащэу гъогу техьагъэх. Тренер-кIэлэ­егъа­джэхэу Джармэкъо Аслъан, Джони Липаридзе, Адзынэ Алый, Роман Оробцевым, нэмыкIхэм агъэсэрэ ныбжьыкIэхэр тиреспубликэ фэбэнэщтых.

КIое Хьазрэт макъэ къы­зэ­ри­гъэIугъэмкIэ, мэфэкум пшъа­шъэхэм язэIукIэгъухэр аублагъэх. Джэджэ районым щапIугъэ Улья­на Ткаченкэр килограмм 40-м нэс къэзыщэчырэмэ якуп хэт, апэрэ зэIукIэгъухэм ахэлажьэ.

Даур Астемир, кг 46-рэ, Геор­гий Паршировыр, кг 66-рэ, Джармэкъо Долэт, кг 55-рэ, ­Батышэ Джамболэт, кг 55-рэ, Джумбер Липаридзе, кг 66-рэ, Уайкъокъо Алыйрэ Вардгез Акопянрэ, кг 90-м къехъух, Адыгеим фэбэнэщтых.

Урысыем дзюдомкIэ ифедера­цие илIыкIоу Къыблэ шъолъырым щыIэ Емыж Арамбый Новосибирскэ ежьэным ыпэкIэ къы­зэрэтиIуагъэу, сэнаущыгъэ ­зыхэлъ ныбжьыкIэхэр илъэс зау­лэкIэ алъэ пытэу теуцощтых. Ахэр арых Олимпиадэ джэгунхэм, Дунэе зэ­IукIэгъухэм ахэлэ­жьэщтхэр. Тренер-кIэлэегъаджэхэм ар къыда­лъытэзэ, агъасэхэрэм пIуныгъэ дэгъу аратыным пылъых.

Тиспортсменхэм Новосибирскэ гъэхъагъэ щашIынэу тяжэ.