Къоджэ пчэгум уегъэгушIо

Афыпсыпэ къоджэзэхэт псэупIэр районымкIэ анахь инхэм ащыщ. Мыщ нэбгырэ минитфым ехъу щэпсэу. Къоджэзэхэт псэупIэм ипчэгур къуаджэу Афыпсып. Ащ нэбгырэ минитIурэ шъитIурэм ехъу щэпсэу. Илъэс къэс къуаджэм хэхъо, зеушъомбгъу.

IMGP1018Къоджэзэхэт псэупIэм хэхьэх къуаджэхэу Псэйтыку, Пэнэхэс, Хьащтыку, Афыпсып, поселкэу Кубаньстроир. Шапсыгъэ къэлэ цIыкIур Афыпсыпэ къыхагъэхьажьыгъ, къуаджэм щыщ хъужьыгъэ.

Учреждениехэр, организациехэр, нэмыкI къулыкъушIапIэхэр псэупIэм дэтых. Къалэм е нэмыкI чIыпIэ умыкIоми, узфэе товархэр, материалхэр, гъомылапхъэхэр къуаджэм щыб­гъотыщтых — тучан пчъагъэхэр щэфакIохэм къяжэх.

Къоджэ пчэгур зэIыхыгъ, зэтегъэпсыхьагъ, тыдэкIи къэбзэ-лъабз, гуIэтыпI. Пчэгум икIы­хьэ-икIыхьэу Шъэумэн Хьазрэт ыцIэ зыхьырэ урамыр пхы­рэкIы. Къоджэзэхэт псэупIэм иадминистрацие дэжь ащ хэ­кIышъ, къуаджэм щыщ усакIоу Жэнэ Къырымызэ ыцIэ зыхьырэ урамыр тыгъэкъохьэпIэ лъэныкъомкIэ макIо.

Апэ дэдэ къоджэзэхэт псэ­упIэм иадминистрацие зычIэт унэм цIыфхэм анаIэ тыра­дзэ. Щагур зэIыхыгъ, хъоо-пщау, уц къашхъом алрэгъу шхъуан­тIэм фэдэу зыщеубгъу. Мафэ къэс лъэгъун зэфэшъхьафхэр яIэу цIыфыбэ мыщ къеуалIэ. Ахэм къафэчэфхэу къапэгъо­кIых, охъ­табэ тырамыгъашIэу яшIоигъо­ныгъэхэр къафагъэ­цакIэх. Къо­джэзэхэт псэупIэм иадминистрацие ипащэу КIа­кIыхъу Ахьмэд кIэлакI, Iушы, иакъыл бэмэ атефэ, Iэдэб хэлъ, иIофшIэн хэшIыкI дэгъу фыриI.

— Къоджэ пчэгур зэрэзэIы­хыгъэщтым, зэрэдгъэдэхэщтым ренэу ыуж тит, — еIо администрацием иIэшъхьэтетэу КIа­кIыхъу Ахьмэд. — Ащ темытэуи хъущтэп: цIыфыб къуа­джэм мафэ къэс къеуалIэрэр, щызэблэкIырэр. Пчэгум тучанитф, аптекитIу, газ участкэр, псыпкIэр, светыпкIэр зыщаIа­хырэ пунктхэр, культурэм и Унэ, я ХХI-рэ лIэшIэгъум иклиник, сымэджэщыр, поликлиникэр, гурыт еджапIэр, сабый IыгъыпIэр, къоджэдэсхэу заом хэкIодагъэхэм ясаугъэт, музыкальнэ еджапIэр, ахэм анэ­мыкIхэри итых. Администрацием и Унэ пэблагъэу щыт ту­чанышхом пчэгу игъэкIотыгъэ иI. Мыщ Iофтхьэбзабэ щыре­кIокIы: ИлъэсыкIэ елкэр щашIы, ермэлыкъхэр щызэхащэх, мэ­фэкI мафэхэм кIэлэцIыкIухэм джэгупIэ афэхъу. Мы чIыпIэм щыт кассэм, почтэм цIыфыбэ яуалIэ, спорт джэгупIэм зэнэкъокъухэр щырагъэкIокIых. Республикэм, районым къары­кIырэ хьакIэхэм саугъэтым дэжь зэIукIэхэр щызэхащэх. Урамышхоу пчэгум пхырыкIы­рэм тапэкIэ машинэхэри, лъэс­рыкIохэри щызэблэкIыщты­гъэх. Ар щынэгъуагъ. Джы урамжъые-лъэс гъогу цIыкIу фашIыгъ щынэгъончъэ хъугъэ. БэмышIэу пчэгум «чIыпIэ шхъуантIэ» къы­щызэIуахыгъ — чъыг цIыкIу шъитIу фэдиз ща­гъэтIысыгъ.

Хъущт Щэбан.