Iэмэ-псымакIэхэр зэрагъэгъотыгъэх

Сымаджэм илэжьэ шъыпкъэр агъэунэфыным ыкIи зэрифэшъуашэу еIэзэнхэм пае Адыгэ республикэ онкологическэ диспансерым иврачхэм ли­нейнэ ускорителымрэ компьютер томографымрэ IэпыIэгъу къафэхъущтых.

Адыгэ республикэ онкологи­ческэ диспансерым чIыпIэ 45-рэ зиIэ ирадиологическэ отде­ление корпусыкIэ къыфызэ­Iуа­хынэу агъэхьазыры. Адэбз уз зиIэхэм IэпыIэгъу афэхъугъэ­ным­кIэ федеральнэ программэм къыдилъытэу 2015-рэ илъэ­сым IэзэпIэ учреждением сомэ миллион 420-рэ къыфа­тIуп­щыгъ. А илъэсым къыкIоцI ахъ­щэу къа­IэкIэхьагъэмкIэ аужырэ шапхъэхэм адиштэрэ меди­цинэ тех­никэ къащэфыгъ ыкIи ар зэты­рагъэпсыхьагъ.

— Iэзэн ыкIи диагностическэ Iэмэ-псымакIэхэр зэдгъэгъоты­гъэх. Ли­нейнэ ускорительрэ ком­-
пью­тернэ томографрэ. Джащ фэ­дэу адэбз узыр зыфэдэр къы­хэзыгъэщыщт иммуно­фер­мент­нэ анализаторрэ иммуно­гисто­ло­ги­ческэ анализаторрэ къытфащагъэх, — къыщеты Адыгэ онкодиспансерэу М. Iэ­шъхьэма­фэм ыцIэ зыхьырэм Iэ­зэн Iоф­шIэнымкIэ врач шъхьа­Iэм игуа­дзэу Датхъужъ Фати­мэ ­ипортал.

Iэмэ-псымакIэмэ Iоф ышIэнэу рагъажьэ. Мыекъуапэ щыпсэу­хэрэм ямызакъоу, ­республикэм исхэми ахэмкIэ яIэзэнхэу амал щыIэ хъущт. Нэбгырэ 20-м ехъу мафэ къэс УЗИ-кIэ ауплъэкIу. Томографымрэ линейнэ ускорителымрэ язэхэгъэуцон мы ма­фэхэм къаухынэу агъэнафэ. Джырэблагъэ ащ изэтегъэуцон пылъых. Iэмэ-псымакIэхэм Iоф адэзышIэщт медицинэ персоналыр нэужым рагъэджэщт.

2015-рэ илъэсым адэбз уз иIэу нэбгырэ 11861-рэ диспансерым иучет хэтыгъ.

— Адэбз узыр нахьыбэрэм къызхэкIырэр цIыфхэр ­тэрэзэу зэрэмышхэхэрэр ары. Мыр лъа­псэ фэхъугъэу процент 35-рэ агъэунэфыгъ. Тутынэшъонри ащ­кIэ къэкIуапIэхэм ащыщ. Мы уз Iаер къыомыутэлIэным пае тыгъэм кIышъор зэримысты­щтым улъыплъэн, гъомылэпхъэ гъэлагъэхэм защыуухъумэн фае. Врачхэм адэжь укIо зэпытын фае, — къаIуагъ Адыгэ Республикэм псауныгъэр къэухъу­мэгъэнымкIэ и Министерствэ испециалистхэм.

(Тикорр.).