Урысые Федерацием и Къыблэ шъолъыр дзюдомкIэ изэнэкъокъу Мыекъуапэ щыкIуагъ. Илъэс 21-м нэс зыныбжьхэр хагъэунэфыкIырэ чIыпIэхэм афэбэнагъэх. Алырэгъум спортсмени 161-рэ щызэIукIагъ.
Адыгэ Республикэм ихэшыпыкIыгъэ командэ дзюдомкIэ итренер шъхьаIэу, Адыгеим изаслуженнэ тренерэу Бастэ Сэлым зэрилъытэрэмкIэ, тиспортсмен ныбжьыкIэхэм хэхъоныгъэхэр ашIых. Мыекъопэ бэнэпIэ еджапIэм ишэн-хабзэхэр лъызыгъэкIотэн зылъэкIыщт кIалэхэр тиIэх.
Тиреспубликэ щыщ нарт шъаоу Мерэм Дамир килограмм 55-м нэс къэзыщэчырэмэ якуп апэрэ чIыпIэр къыщыдихыгъ. ПашIо Алый тыжьын медалыр фагъэшъошагъ. Штымэ Чыназ ятфэнэрэ хъугъэ.
Щыгъущэ Амир, кг 66-рэ, джэрз медалыр къыхьыгъ. Георгий Ломидзерэ Тулпэрэ Ахьмэдрэ ятфэнэрэ чIыпIэхэр къыдахыгъэх. Сартион Липаридзе, кг 73-рэ, джэрз медалыр фагъэшъошагъ. Кобл ТIахьир, кг 90-рэ, я 5-рэ хъугъэ.
Пшъашъэхэм язэIукIэгъухэри гъэшIэгъоныгъэх. Тиспортсменкэу Дарья Ищенкэм, кг 48-рэ, тыжьын медалыр къыдихыгъ. Надежда Лоцман, кг 63-рэ, Светлана Косенко, кг 70-рэ, Ирина Косенко, кг 78-рэ, дышъэ медальхэр къыдахыгъэх. Виктория Зайцевам, кг 70-рэ, ятIонэрэ чIыпIэр къыхьыгъ. Къэлэбый Рузанэ, кг 52-рэ, Анна Мурадян, кг 57-рэ, Алеся Ереминам, кг 70-рэ, я 3-рэ чIыпIэхэр къыдахыгъэх.
Краснодар краим ибэнакIохэу Нэгъуцу Джамболэт ыгъасэхэрэм медаль макIэп къыдахыгъэр. Джамболэт ыпхъоу Данэ, кг 57-рэ, Ацумыжъ Казбек, кг 60, Севак Папикян, кг 66-рэ, Александр Колесник, кг 73-рэ, апэрэ чIыпIэхэр афагъэшъошагъэх. Ацумыжъ Азамат, кг 60, я 3-рэ хъугъэ.
Тхьаркъохъо Казбек, кг 81-рэ, Краснодар краим фэбэнагъ, апэрэ чIыпIэр къыдихыгъ. Мыекъуапэ щагъэсэгъэ тренерэу А. Коноваловыр ащ ипащ.
Ермэлхьаблэ тренер-кIэлэегъаджэу Iоф щызышIэрэ Псэунэ Муратэ ыгъасэрэмэ ащыщхэми медальхэр къахьыгъэх.
ХагъэунэфыкIыгъэ чIыпIэхэр къыдэзыхыгъэхэр Урысыем иныбжьыкIэхэм якIэух зэнэкъокъоу гъэтхапэм и 2 — 5-м Ростов-на-Дону щыкIощтым хэлэжьэщтых.
Сурэтхэр зэнэкъокъум къыщытетхыгъэх.