Гриппыр зэкIакIоу ригъэжьагъ, арэу щытми…

Шъугу къэдгъэкIыжьын имыщыкIагъэу къысшIо­шIы щылэ-мэзае мазэхэм пэтхъу-IутхъумкIэ ыкIи гриппымкIэ гумэкIыгъохэм Адыгеир зэрахэты­гъэр, сымаджэ хъугъэхэм япчъагъэ гурыт шапхъэхэм зэрашъхьэдэкIыгъагъэр.

3958_5482b2d4-9f3c-4017-b2de-6658c126b237Роспотребнадзорым АР-мкIэ и ГъэIорышIапIэ тхьамэфэ зэфэхьысыжьэу ышIыхэрэм къы­зэрагъэлъэгъуагъэмкIэ, ­мэзаем и 1 — 7-м пэтхъу-Iутхъур нэ­бгырэ 1917-мэ ыкIи гриппыр нэбгырэ 40-мэ къяузыгъэу рес­публикэм щатхыгъ. Нэбгырэ мини 10 зыпштэкIэ, нэбгырэ 42,9-мэ къяутэлIагъэу агъэунэ­фыгъ. Ар тхьамафэм иэпидемическэ гъунапкъэ проценти 8,1-кIэ нахь макI. Анахьэу джы­дэ­дэм сымаджэхэрэр ныбжь зи­Iэхэр ары (нэбгырэ мини 10-м ипроцент 28,8-р). Зыныбжь илъэситIу мыхъугъэхэр эпидемическэ гъунапкъэм процент 18,1-кIэ нахь макI, илъэси 3 — 6-хэр — процент 49,2-кIэ, илъэси 7 — 14-хэр — процент 39,6-кIэ.

ЫпшъэкIэ зигугъу къэтшIыгъэ уахътэм къыкIоцI Мыекъуапэ пэтхъу-Iутхъур нэбгырэ 628-мэ ыкIи гриппыр 12-мэ къяузыгъэу щатхыгъ. Нэбгырэ мини 10-р пштэмэ, нэбгырэ 37,5-мэ къя­утэлIагъэу агъэунэфыгъ. Тхьамафэм иэпидемическэ гъуна­пкъэ ар процент 43,4-кIэ нахь макI.

Пчъагъэхэм къызэрагъэлъа­гъорэмкIэ, гриппыр зэкIакIоу ригъэжьагъ, арэу щыт нахь мы­шIэми, джыри цIыфхэм сакъы­ныгъэ къызхагъэфэнэу, вирусхэр зыукIырэ уцхэм ­яшъонхэу, бжьын-бжьыныфхэр ашхынхэу, гигиенэм ишапхъэхэр зэрахьанхэу медицинэм иIофы­шIэхэр къяджэх.

Гъэсэныгъэм иучреждениехэм карантиныр атырахы­жьыгъ нахь мышIэми, джыри сыма­джэхэм япчъагъэ зэрэбэкIаем къыхэкIэу, уплъэкIун гъэнэфа­гъэхэр ащызэрахьэх.

Iэшъынэ Сусан.