Урысые Федерацием лъэпкъ къашъохэмкIэ изэнэкъокъу Москва щыкIуагъ.
Щылэ мазэм и 21 — 27-м хэгъэгум ишъолъырхэм яансамблэ 50 апэрэ чIыпIэм фэбэнагъ, Тэхъутэмыкъуае икIыгъэ купэу «Адыгэхэр» зыфиIорэм текIоныгъэр къыдихи, шIухьафтын шъхьаIэр къыфагъэшъошагъ.
Къыблэ шъолъырым иансамблэхэм япэшIорыгъэшъ зэнэкъокъоу Ростов-на-Дону щызэхащагъэм «Адыгэхэм» апэрэ чIыпIэр къыщыдахи, Москва кIонхэу фитыныгъэ къаратыгъ. Москва зэнэкъокъур зыщаублэм, апэрэ едзыгъом анахь дэгъухэу щалъытэгъэ ансамблэ 15 къыхахыгъ. А купым «Адыгэхэр» хэфагъэх, нэужым финалым яIэпэIэсэныгъэ къыщагъэлъэгъуагъ.
Тэхъутэмыкъое районым илIыкIохэр чемпион хъугъэх, шIухьафтын шъхьаIэр къафагъэшъошагъ. Ансамблэм ихудожественнэ пащэр КIэмрыгъо Азэмат.
КIэлэеджакIохэм язэнэкъокъу ансамблэу «Къашъом» апэрэ чIыпIэр къыщихьыгъ, дипломыр къыратыгъ. Тхьаркъохъо Тимур купым ихудожественнэ Iэшъхьэтет.
КъэшъуакIохэр Урысыем изэнэкъокъу хэлэжьэнхэмкIэ Тэхъутэмыкъое районым иадминистрацие ипащэу Шъхьэлэхъо Азмэт IэпыIэгъу афэхъугъ. Районым культурэмкIэ игъэIорышIапIэ ипащэу КIэлэбый Зурыет тызэрэщигъэгъозагъэу, Тэхъутэмыкъуае икъэшъокIо купхэм япчыхьэзэхахьэ мэзаем и 5-м районым культурэмкIэ и Унэшхо щыкIощт. Искусствэр зышIогъэшIэгъонхэр зэхахьэм рагъэблагъэх.