Адыгэхэм я ИлъэсыкIэ гъэтхапэм и 21-м игъэкIотыгъэу тиреспубликэ щагъэмэфэкIыщт. ЗэхэщэкIо купым иапэрэ зэхэсыгъохэр общественнэ движениеу «Адыгэ Хасэм» щыкIуагъэх.
ШэнышIу зэрэхъугъэу, псэупIэу Гавердовскэм дэт IофшIапIэу «Нанэм» мэфэкIыр щызэхащэщт. Адыгэ Республикэм кульурэмкIэ и Министерствэ, республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет, Адыгэ Хасэр зэгъусэхэу ИлъэсыкIэм фэгъэхьыгъэ зэхахьэр зэхащэщт.
Нэгъуцу Аслъан, Къуижъ Къэплъан, Чэмышъо Гъазый, Чэтыжъ Аслъан, ГутIэ Рэмэдан, ЦIыкIушъо Аслъан, Болэкъо Аслъан, нэмыкIхэри зэхэсыгъом къыщыгущыIагъэх. Лъэпкъ Iэмэ-псымэхэм апыщагъэхэм ятворчествэ ехьылIэгъэ къэгъэлъэгъон зэхащэщт.
Нэгъуцу Аслъан къызэриIуагъэу, ныбжьыкIэхэр бэ хъухэу мэфэкIым хагъэлэжьэщтых. КъумпIыл ТIахьирэ япащэу студентхэр, кIэлэеджакIохэр зэхэщэн Iофыгъохэм апылъыщтых. Адыгэ Республикэр илъэс 25-рэ зэрэхъурэр къадалъыти, искусствэм ехьылIэгъэ зэнэкъокъу зэхащэнэу рахъухьагъ. СурэтышI ныбжьыкIэхэм яIэпэIэсэныгъэ фестивалым къыщагъэлъэгъощт, лъэпкъ тхыпхъэхэр ашIыщтых, орэдыIо ыкIи къэшъокIо купхэр мэфэкIым къырагъэблэгъэщтых. Сэнаущыгъэ зыхэлъ ныбжьыкIэхэр къыхагъэщыщтых, адыгабзэм изэгъэшIэнрэ игъэфедэнрэ афэгъэхьыгъэ зэнэкъокъур гъэшIэгъон хъущтэу тэлъытэ.
Сахьидэкъо Нурбый.
Сурэтыр зэхахьэм къыщытырахыгъ.