Адыгеим илъэпкъ тхакIоу, зэлъашIэрэ цIыфышIоу Кощбэе Пщымафэ щыIагъэмэ ыныбжь илъэс 80 хъущтыгъэ. Ащ нэсыгъэп, сыдэу пшIына. Инасып къыхьыгъагъэмэ мы мэфэкIым нэсынэу, гушIокIо баIуа ащ къыфэкIощтыгъэр?! Ау зэраIоу, «Тхьэм ышIэрэр игъу, ащ пыIухьэ фэшIыжьыгъуай!»
Кощбэе Пщымафэ щыIэныгъэ ыкIи творческэ гъогу зафэ къыкIугъ. ШIэныгъэкIи, къулайкIи къыфэт щыIагъэп. Итхэн Iоф пыIухьанчъэу дэгъу дэдэу зэшIуихызэ къырыкIуагъ. Хэти зышIэщтыгъэхэм зэрэIушыгъэр, шIэныгъэшхо зэрэкъолъыгъэр, Iофыр зэрикIэсагъэр, цIыфхэр зэрилъэпIагъэр ашIэ, къаIуатэ, ишIэжь агъэлъапIэ.
Тэри, иIахьыл-лыщыщхэм, игупсэхэм, джащ фэдэ къабзэу ичIыпIэгъухэм, икъоджэгъухэм, иIофшIэгъухэм, зыфэтхэгъэ тхылъеджэхэм ар зыкIи тщыгъупшэрэп. «ЫIуагъ, ышIагъ» — тIозэ ренэу игугъу тэшIы. Пщымафэ гукIэгъушIэ дэдагъ, фэлъэкIырэмкIэ къогъанэ иIагъэп, ишIуагъэ бэмэ аригъэкIыщтыгъ, дысыгъэ хэмылъэу, хьалэл зэфагъ. ИунагъокIэ, илъфыгъэхэмкIэ гуIэлэ-гумэкIылагъ. Ежь ышъхьэкIэ егъашIэм щысэ дэгъу афэхъузэ къырыкIуагъ: укIытэ, нэхъой сыдымкIи хэлъыгъ, щыIэныгъэмкIэ — губзыгъагъ. Зыфэсакъыжьэу, лъытэныгъэ хэлъэу, шъхьэкIафэ ухэтми зыфыуигъэшIыщтыгъ, интеллигентыгъ.
Ти Пщымафэ, зэкIэ адыгэ лъэпкъыми, Кощбэе лIакъоми, тэ, ныкъылъфыгъэ-IахьылхэмкIи тын инэу Тхьэм къытитыгъагъ. Тигъэгушхоу, тигъэгъуазэу сыдымкIи къытфэсакъэу щытыгъ.
ЛIэшIэгъуныкъом ехъум лъэпкъ литературэм щылэжьагъ, иIахь ини хилъхьагъ. Ау ныбжьи ышъхьэ шIоIофыгъэп, нэмыкIхэм зэрадеIэщтыр, афишIэщтыр ары зыпылъыгъэр. Зы шъхьэгъэтхъэгъу гъэпсэфыгъо имыIэу (зэ ыкъо-ыпхъухэр ригъэджэнхэ, етIанэ унэгъуакIэ зэхъухэм, сабыйхэр яIэу, адеIэныр ыпшъэ рилъхьэжьыгъ) дунэе нэфым ехыжьыгъ.
Ау итхылъ ушъагъэхэу тимэкIайхэм атетхэр, ежь Пщымафэ ымакъэкIэ, игулъытэкIэ къыддэгущыIэх. Тэ тизакъоп, ахэр тхакIом икIэсэ иадыгэ лъэпкъ нэпэеплъ Iушхэу къыфигъэнагъэх. Арышъ, тэ, иунагъо щыщхэми, Пщымафэ илъфыгъэхэми — ыкъо-ыпхъухэм, ахэм ябынхэми, ишъхьэгъуси, илэгъу-ныбджэгъу дэдэхэми, егъашIэм ар къыдготыщт, тщыгъупшэщтэп, сыдигъуи тиупчIэжьэгъущт.
Кощбэе Пщымафэ ышыпхъоу Елена.