Урысыем ифестиваль-зэнэкъокъоу «Жъуагъохэм ядунай» зыфиIорэр Ставрополь краим икъалэу Невинномысскэ щыкIуагъ. КъэшъокIо ансамблэ 30 фэдиз зэхахьэм хэлэжьагъ. Адыгеим икIэлэцIыкIу купэу «Абрекхэр» зыфиIорэм шIухьафтын шъхьаIэу Гран-прир къыфагъэшъошагъ.
Къэрэщэе-Щэрджэсым, Ростов хэкум, Краснодар ыкIи Ставрополь крайхэм, Адыгеим яансамблэхэр зэIукIагъэх. Непэрэ уахътэм нахь ашIогъэшIэгъон лъэпкъ къашъохэр къагъэлъэгъуагъэх.
ЯIэпэIэсэныгъэ нахьышIоу къызэIуахын ямурадэу ансамблэхэм къэшъуи 2 — 3 къашIэу къыхэкIыгъ. Къэшъо зэхэтэу «НыбжьыкIэ Адыгеир» зыфиIорэр «Абрекхэм» къашIыгъ. Жюрим иунашъокIэ зы къашъомкIэ осэ ин тикIэлэеджакIохэм къафашIи, Гран-прир къыфагъэшъошагъ.
— ЗэкIэ тикъэшъуакIохэм тагъэгушIуагъ, адыгэмэ ялъэпкъ шэн-хабзэхэр пчэгум дахэу къыщагъэлъэгъуагъэх, — къытаIуагъ купым ипащэхэу Къэбэхьэ Анзоррэ ТхьакIумэщэ Налбекрэ. — КIэлэцIыкIухэм янэ-ятэхэм гъэзетымкIи «тхьашъуегъэпсэу» ятIожьы тшIоигъу. Гъусэ къытфэхъухи, Невинномысскэ къыддэкIуагъэхэр ны-тыхэм къахэкIыгъэх.
Къашъохэр къыхэзыдзэгъэхэ Шыхъэстэнэ Миланэрэ Мамыжъ Эльдаррэ, трюкхэр къэзышIыгъэхэ Хьакурынэ Расул, Бэрэчэт Амир, Хьаткъо Расул, къашъохэм яедзыгъохэр къэзышIыгъэхэм зэхэщакIохэр Iэгу къафытеуагъэх. Дунэе фестиваль-зэнэкъокъоу гъэтхапэм Шъачэ щыкIощтым «Абрекхэр» рагъэблэгъагъэх, ыпкIэ лъамытэу зэхахьэм тикIэлэеджакIохэр хагъэлэжьэщтых.
— Къашъохэм ямызакъоу, адыгэ шэн-хабзэхэр кIэлэцIыкIухэм ятэгъашIэх, — зэдэгу-
щыIэгъур лъегъэкIуатэ Адыгэ Республикэм изаслуженнэ артистэу Къэбэхьэ Анзор. —
Адыгэ быракъыр агъэбыбатэзэ пчэгум щыуджыхэ зыхъукIэ, гушIуагъоу анэгу кIэтлъагъорэм тегъэгушхо.
Шъачэ щыкIощт Дунэе фестивалым ыуж адыгэ быракъым и Мафэ фэгъэхьыгъэ мэфэкIэу тиреспубликэ щызэхащэщтым хэлэжьэнэу ансамблэм зегъэхьазыры.