Урысыем и Къыблэ шъолъыр дзюдомкIэ изэнэкъокъу Адыгэ къэралыгъо университетым щыкIуагъ. Илъэс 18-м нэс зыныбжь кIалэхэр, пшъашъэхэр алырэгъум щыбэнагъэх.
ДзюдомкIэ бэнэкIо 400 фэдиз зэIукIэгъумэ ахэлэжьагъ. ХагъэунэфыкIырэ чIыпIэхэр къыдэзыхыгъэхэм ямызакъоу, я 5 — 6-рэ чIыпIэхэр зыхьыгъэхэм ащыщхэм Урысыем икIэух зэнэкъокъоу Новосибирскэ мэзаем щыкIощтым яIэпэIэсэныгъэ къыщагъэлъэгъон алъэкIыщт.
Адыгеим испортсменхэу медальхэр къыдэзыхыгъэхэм шъуащытэгъэгъуазэ. Даур Астемир, кг 46-рэ, апэрэ чIыпIэр къыфагъэшъошагъ, тренерхэр Шъынэхъо Муратрэ Бэгъэдыр Руслъанрэ. Джармэкъо Долэт, кг 55-рэ, тренерхэр Хьакурынэ Дамиррэ Джармэкъо Аслъанрэ. Батышэ Джамболэт, кг 55-рэ, тренерыр Хьакурынэ Дамир. Д. Джармэкъом апэрэ чIыпIэр къыхьыгъ, Дж. Батышэр ящэнэрэ хъугъэ.
Джумбер Липаридзе, кг 66-рэ, ящэнэрэ чIыпIэр къыдихыгъ, тренерхэр Джони Липаридзерэ Сергей Шутовымрэ. Уайкъокъо Алый, кг 90-м ехъу, ящэнэрэ хъугъэ, тренерыр Хьахъукъу Адам.
Пшъашъэхэм язэIукIэгъухэм Ульяна Ткаченкэм, кг 44-рэ, апэрэ чIыпIэр къыащыдихыгъ, тренерхэр Адзынэ Алый ыкIи Светлана Гиря.
Краснодар краимрэ Адыгеимрэ ябэнакIохэр яIэпэIэсэныгъэкIэ нахь къахэщыгъэх.
Урысыем дзюдомкIэ ифедерацие илIыкIоу Къыблэ шъолъырым щыIэ Емыж Арамбый, Урысыем изаслуженнэ тренерэу Рудольф Бабоян, Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлым, Адыгеим иныбжьыкIэхэм дзюдомкIэ яхэшыпыкIыгъэ командэ итренер шъхьаIэу Роман Оробцовым, спорт еджапIэм ипащэу КIое Хьазрэт, Адыгэ Республикэм физкультурэмрэ спортымрэкIэ и Комитет итхьаматэу Хьасанэкъо Мурат, нэмыкI тренерхэм, спортсменхэм къэбар макIэп къытфаIотагъэр. Дзюдор зы чIыпIэ зэримытыр, хэхъоныгъэхэр ышIынхэм пащэхэр зэрэпылъхэр зэкIэми къыхагъэщыгъ. Аныбжь зикъукIэ, тиспортсмен чъэпхъыгъэхэм къахэуцощтхэр тиIэх.
Сурэтыр зэнэкъокъум къыщытетхыгъ.