Тинеущрэ мафэ зыфэдэщтыр бэкIэ зэлъытыгъэр ныбжьыкIэхэр ары. Лъэпкъым изегъэужьыжьын епхыгъэ Iофыгъохэм язэшIохын ахэр пылъхэу зыплъэгъурэм, лъэшэу гуапэ пщэхъу. Къэбэртэе къэралыгъо драмтеатрэу ШэуджэнцIыкIу Алый ыцIэ зыхьырэм иартисткэу ХьахъупэшIэ ФатIими лъэпкъ Iофхэм агъэгумэкIыхэрэм зэу ащыщ.
Илъэс пчъагъэ хъугъэу мы театрэм Iоф щызышIэрэ пшъашъэр спектаклэ зэфэшъхьафхэм, адыгэ зэфэсхэм, пчыхьэзэхахьэхэм бэрэ ахэлажьэ.
Теплъэ дахэ зиIэ пшъашъэм иадыгабзэ зэрэкъабзэм гу къылъатагъ, ыцIэ чIыпIабэмэ дахэкIэ щыраIуагъ. Ау ащ джыри тыщэгугъы къыдэхъугъэхэм къащымыуцоу тапэкIи нахь ахигъэхъонэу.
ФатIимэ къызэрэтфиIотагъэмкIэ, джыри цIыкIузэ цIыфхэм апашъхьэ зыкъыщигъэлъэгъоныр зэрикIасэм янэ гу къызылъетэм, ЖъакIэмыхъу КIунэ зыдэлэжьэрэ купым хигъэхьэгъагъ. Джащыгъум искусствэм апэрэ лъэбэкъухэр щызышIыгъэм ащ къинэу хэлъыр ыгъэунэфыгъэу щытми, къызэкIэмыкIоу пшъашъэр ихъопсапIэ фэкIуагъ. ФатIимэ ятIонэрэ лъэбэкъур зидзыгъэр искусствэхэмкIэ Темыр Кавказ къэралыгъо институтым зычIахьэр ары. Гъогууанэу къыкIугъэр мыинми, зыкIи зэрэкIэмыгъожьыгъэр ащ къеIо.
— Сэ рольхэр зэхэсыдзыхэрэп, актер шъыпкъэм сыд фэдэрэ роли къышIышъоу щытын фае, анахь шъхьаIэр — цIыфхэр зэригъэгупшысэжьхэу, ушъый горэ ащ къыхахэу щытыныр ары, — къеIуатэ ХьахъупашIэм. — Ролэу къэсшIыгъэхэмкIэ спектаклэм еплъыхэрэм гупшысэ горэхэр язгъэшIышъугъэу, утыгум къислъхьэгъэ образхэм яшIуагъэкIэ ядунае нэмыкIынэкIэ хэзгъэплъэжьышъугъэхэу къысщэхъу.
Артисткэм зэрилъытэрэмкIэ, цIыфыр гущыIэным ыпэкIэ къыIощтым егупшысэн, зыр зым фэсакъыжьэу, лъытэныгъэ зэфыряIэу, зэхэшIыкI ахэлъэу псэунхэ фае. Джащ тетэу ежь Iоф зыщишIэрэ театрэм щагъэуцурэ спектаклэхэм роль зэфэшъхьафхэр гъэшIэгъонэу къащешIы.
Мы аужырэ илъэсхэм ФатIимэ анахьэу къыдэхъугъэхэм ащыщэу ылъытэрэр режиссер IэпэIасэу Дэбагъо Роман Iоф къызэрэдишIэрэр ары. А режиссерым ишIуагъэкIэ пшъашъэм идунэееплъыкIэ зэблэхъугъэ хъугъэ. Уахътэ тешIэ къэси ащ къыфагъэшъошэрэ рольхэр нахьыбэ, нахьышIу мэхъух. Щэч хэмылъэу пшъашъэм иIэпэIэсэныгъэ хэзыгъахъохэрэми ар ащыщ.
2015-рэ илъэсыр пшъашъэмкIэ илъэс дэгъугъ. Урысые Федерацием итеатральнэ IофышIэхэм я Союз ыгъэнэфэгъэ стипендиеу культурэм ылъэныкъо Iоф зышIэрэ ныбжьыкIэхэм афагъэшъуашэрэр (сомэ мин 20) тиреспубликэкIэ мазэ къэс зэратыгъэр а зыр ары.
Пшъэшъэ ныбжьыкIэр псышкуашком фэбгъадэ хъунэу сэлъытэ. Псышкуашком къежьапIи, псынашъхьи иIэх. Ащ икъэбзагъэ, икууагъэ, иIэшIугъэ бэ ялъытыгъэр. Ау нахьыбэу зэлъытыгъэр а псышкошко цIыкIум пхырищырэ гъогур, иерышыгъ ары. ЦIыфхэри джащ фэдэх: лъэпкъым ипсышъхьэ зэнзэныпсэу къабзэу псышкошкуабэ къыщежьэ. Зыхэр псышхом къабзэу нэсых, адрэхэр жьымрэ псымрэ ягъогу къыпабзыкIышъ, ахэм ямынэкъокъушъухэу къызэтеуцох, нэмыкIхэр псыефэх мэхъухэшъ, псэ зыпытым пшъхьапэ фэхъух. Лъэпкъ Iофхэр чанэу зезыхьэрэ, ащ инеущрэ мафэ зыфэдэщтым фэгумэкIырэ пшъашъэм иIофхэр дэгъоу зэпыфэнхэу фэтэIо, ролыкIэхэмкIэ тапэкIи тигъэгушIонэу тыщэгугъы.
Шъомахо Залин.