Музыкантэу, композиторэу, аранжировщикэу КIытIэ Тимур Москва къыщыхъугъэми ыкIи ащ шIукIаерэ щыпсэугъэми, мэкъамэм икъыхэхын фэIэзэ кIалэм ихэкур Къэрэщэе-Щэрджэсыр ары.
Ащ ятэу Ахьмэд Зеикъо къуаджэм къыщыхъугъ, янэу Фатимэ Учкулан щыщ. Илъэс пчъагъэрэ хэгъэгум икъэлэ шъхьаIэ дэсыгъэ унагъор ихэкужъ къыгъэзэжьыгъэу Щэрджэскъалэ щэпсэу.
ГъэшIэгъоныр пщыналъэхэм, орэдышъохэм якъыхэхынкIэ зэчыишхо зыхэлъ кIалэр а Iофым зэрэфемыджагъэр ары. Тимур бизнесымрэ правэмрэкIэ факультетыр, психологиемкIэ аспирантурэр къыухыгъэх. Ау мэкъамэмрэ лъэпкъ культурэмрэ шIулъэгъоу афыриIэр нэмыкIхэм апшъэ хъугъэ.
Ыныбжь илъэси 10-м итэу Тимур гитарэм мэкъамэхэр къыригъэкIхэу ыублагъ. Ащ зыми фигъэсагъэп, мэкъамэхэм акIэдэIукIызэ ыгу рихьырэр, ыпсэ хапкIэрэр ежь-ежьырэу къыхихыщтыгъ. Илъэс 20 ыныбжьэу кIалэр музыкальнэ еджапIэм чIэхьэгъагъ, ау илъэс нахь чIэмысыгъэу къычIэкIыжьыгъ. ЕтIанэ ежь-ежьырэу иIэшIагъэ хигъахъоу ригъэжьагъ.
Тимур иIэшIагъэ зыкIагъэшIагъорэр лъэпкъ мэкъамэр дахэу гитарэ бзэпсым зэрэри-
гъэкIушъурэр ары. Лъэпкъ мэкъамэхэм ащыщэу апэ дэдэ ащ гитарэмкIэ къыригъэIуагъэр «Оркъ къашъор» ары.
— КъэшъокIо купэу «Кабардинкэм» хэтхэм яконцерт сеплъызэ, «Оркъ къашъом» имэкъамэ сыдихьыхыгъагъ. А лъэхъаным унэм сисэу тефагъэти, гитарэр къасшти, мэкIэ-макIэу орэдышъор къизгъэкIэу сыублагъэ, уахътэ зытешIэм, сызэрэфаем фэдэу ар къезгъаIо хъугъэ, — ыгу къэкIыжьы Тимур.
Музыкантыр ыгукIэ нахь зыпэблэгъэ мэкъамэхэр зыфэдэхэм тызыкIэупчIэм, мары джэуапэу къытитыжьыгъэр:
— Мэкъэмэ зэфэшъхьафхэм сядэIу. Ау анахьэу сикIасэхэр IорIуатэм епхыгъэхэр ары. Кельт, балкан, китай IорыIуатэхэм ахахьэхэрэ мэкъамэхэр сыгу рехьых. Кавказым ис лъэпкъхэм яIорIуатэ хы гъунэнчъэм фэд, ащ спсэ дэзыхьыхэу бэ къыхэсэгъуатэ, — къыддэгуащэ иеплъыкIэхэмкIэ КIытIэр.
Гитарэм имызакъоу, нэмыкI мэкъэмэ Iэмэ-псымэхэми Тимур дахэу къарегъаIо. Пщынэм, Iэпэпщынэм, шыкIэпщынэм, накъырэм къызэрибгъэкIыщт амалхэр ыIэ къыригъэхьагъэхэми, кIэлэ укIытапхэм гитаристэу ары зызэрилъытэрэр.
НэмыкI къэIуакIэ аритыгъэуи, ежь ыусыгъэуи музыкальнэ произведение 30-м ехъу КIытIэм иI. НахьыбэрэмкIэ ахэр Кавказым ис лъэпкъхэм якультурэ къыхэхыгъэх. Музыкантым ыгу нахь рихьырэ мэкъамэр къыхехы, ежь зэрилъытэрэм тетэу Iоф ащ дешIэжьышъ, пчэгум къырехьэ. Тимур иаранжировкэкIэ, зыми фэмыдэ изэчыйкIэ пэсэрэ мэкъамэхэм псэ къапегъэкIэжьы. КIалэм Iоф зыдишIэгъэ мэкъэмэ нахь цIэрыIохэм ащыщых «Къэшъо кIыхь», «Сидунай», «Лъэпэрышъу» зыфиIохэрэр. Тимур ахэр зыдигъэцэкIагъэр пщынэо Iазэу, ливан адыгэхэм ащыщэу Бланэгъэпс Нарт.
Проектэу «Nartstone» зыфиIорэр музыкантым ихъопсапIэхэм зэу ащыщ. Ащ мэкъэмэ композиции 8 — 9 хэхьэ. Орэдхэу «Песня шапсугских пиратов», «Последний бой сына камня» зыфиIохэрэр ащ щыщых. Лъэпкъыгу шъыпкъэ зиIэ Тимур титарихъ зэпычыгъэ гукIэ лъыIэсышъугъ, пасэм фэдэу, тинеущрэ мафэ шыкIэпщынэм бзэпс мэкъэмэ къабзэрэ орэдыжъхэмрэ щыIунхэу, тфэмэфэнэу лъэгъо дахэ пхырищыгъ.
ГъукIэкъул Ирин.