ИкIыгъэ илъэсым цIыфхэр зыщыпсэухэрэ унэхэм ягъэцэкIэжьын пэIуагъэхьанэу Адыгеим къыщаугъоигъэ ахъщэр сомэ миллион 75,5-рэ зэрэхъугъэр.
Нахьыбэу къызщаугъоигъэр къалэу Мыекъуапэ, мыщ щыпсэурэр нахьыб. Адыгэкъалэ ауж къинагъ, къаугъоин фэягъэм ызыщанэ нахь мыщ дэсхэм фондым къырагъэхьагъэп.
Мыкоммерческэ организациеу «Капитальнэ гъэкIэжьынхэмкIэ Адыгэ Республикэм и Фонд» зыфиIорэм итхьаматэу Пщыгъонэ Руслъан къызэриIорэмкIэ, ахъщэу цIыфхэм къатыгъэр къаугъоин фэягъэм ызыныкъо нахьи нахьыб.
Урысыем ичIыпIэхэр зэкIэ пштэхэмэ, гурытымкIэ мылъкоу къаугъоин фэягъэр процент 73-м кIагъэхьагъ. Тиреспубликэ къыщаугъоигъэр ащ процент 20-кIэ нахь макI.
Урысые Федерацием псэолъэшIынымрэ псэупIэ-коммунальнэ хъызмэтымрэкIэ и Министерствэ ипащэу Михаил Мень бэмышIэу зэхищэгъэгъэ видеозэхэсыгъом унэ зэтетхэм ягъэцэкIэжьын хагъэхьащт ахъщэм икъэугъоин зэрагъэпсынкIэщтым щытегущыIагъэх. ГъэцэкIэжьын IофшIэнхэр зэрагъэцакIэхэрэм нахь пхъашэу лъыплъэнхэу къыIуагъ. ТыдэкIи унэу щызэтырагъэпсыхьажьыхэрэм хэукъоныгъэхэр зэрэхашIыхьэхэрэр, ахэм псэолъэшIхэр зэрямыуцолIэжьыхэрэр къыхигъэщыгъ.
Народнэ фронтыри мы Iофтхьабзэм къыхэлажьэу ригъэжьагъ. Ащ илIыкIохэр Урысые Федерацием ишъолъыр пстэумэ анэсых, унэхэр зэрагъэцэкIэжьыхэрэр ауплъэкIух.
ИкIыгъэ илъэсым итыгъэгъэзэ мазэ нэс къатын фэе мылъкоу шъолъыр операторым къылъытагъэр сомэ миллион 91-м къехъу, къаугъоигъэр миллион 46-м шIокIы. ГъэцэкIэжьын IофшIэнхэм апэIуагъэхьащт ахъщэм иугъоин зэрагъэпсынкIэн фаер джыри агу къыгъэкIыжьыгъ. Ащ къызэриIорэмкIэ, ахъщэ чIыфэ зытелъ нэбгыри 100-м ехъумэ яIофхэр хьыкумым зэхифынхэу ратыгъэх. Нэбгырэ минитф фэдизмэ ахъщэу агъэгужъуагъэр къатыжьынэу макъэ арагъэIугъ, ахэм сомэ миллион 11-м ехъу къамытыгъэу ателъ.
Къалэу Мыекъуапэ илъэсым къыкIоцI къыщаугъоигъэр нахьыбэми, псэупIэ зиIэ ятIонэрэ цIыф пэпчъ чIыфэ телъ. 2016-рэ илъэсым къалэм изакъоу унэ 14 щагъэцэкIэжьынэу рахъухьагъ, IофшIэнхэм сомэ миллион 43-м ехъу апэIуагъэхьанэу щыт. ИлъэсыкIэу къихьагъэм цIыфхэм къаугъоирэ ахъщэм къыхагъэхъонэу, гъэцэкIэжьын IофшIэнхэм атырагъэкIодэщт мылъкум зыкъиIэтынэу Р. Пщыгъуанэр мэгугъэ.
Шъаукъо Аслъангуащ.