Адыгэ Республикэм иминистрэхэм я Кабинет зичэзыу планернэ зэхэсыгъо тыгъуасэ иIагъ.Ар зэрищагъ республикэм и Правительствэ и Тхьаматэу КъумпIыл Мурат. Министерствэхэм, ведомствэхэм, къулыкъухэм яIофшIэн зэфэхьысыжьхэр фашIыгъэх, пшъэрылъ шъхьаIэхэр агъэнэфагъэх.
ГриппымкIэ ыкIи пэтхъу-IутхъумкIэ эпидемиологие Iофхэм язытет зыфэдэм КъумпIыл Мурат апэдэдэ кIэупчIагъ.
АР-м псауныгъэр къэухъумэгъэнымкIэ иминистрэу Мэрэтыкъо Рустемэ къызэриIуагъэмкIэ, зэпахырэ узыр къызэутэлIагъэу республикэм щагъэунэфыгъэр бэ, IэпыIэгъу псынкIэм къеджэхэрэм япчъагъэ къыщыкIэрэп, чэщ-зымафэм къыкIоцI врачхэр сымэджэ 407-рэ фэдизмэ алъэIэсых. Гриппым ыкIи пэтхъу-Iутхъум апэуцужьырэ Iэзэгъу уцхэу, цIыфым нахь ищыкIагъэхэр аптекэхэм ателъых, ау Iэзэгъу уц лъапIэхэм ащыщхэр мы уахътэм пщэфынхэр къин хъугъэ.
— ЦIыфым ипсауныгъэ зыпкъ изыгъэуцожьыщт Iэзэгъу уцхэм ауасэ аптекэ-хэм къамыIэтыным, ахэр сымэджэщхэм икъу фэдизэу ачIэлъынхэм тынаIэ тедгъэтын фае. Непэрэ къиныгъохэр къызфэзыгъэфедэхэзэ уасэхэр къэзыIэтырэ е Iэзэгъу уцхэр щымыIэхэу зыIорэ медицинэ учреждениехэм пытагъэ хэлъэу уадэзекIоныр атефэ. Ащ фэдэ чIыпIэ рихьылIэгъэ цIыфхэм профильнэ министерствэм ипащэ зыкъыфагъэзэн алъэкIыщт, — къыIуагъ КъумпIыл Мурат.
Вице-премьерэу Наталья Широковам къызэрэхигъэщыгъэмкIэ, республикэм ит кIэлэцIыкIу IыгъыпIэхэм ачIэсхэм япроценти 5-р ыкIи гурыт еджапIэхэм ащеджэхэрэм япроценти 3,7-р сымаджэхэу мы уахътэм гъэсэныгъэм иучреж-дениехэм къакIохэрэп. А пчъагъэхэм уакъыпкъырыкIымэ, еджапIэхэр зэфашIынхэм ищынагъо щыIэгоп. Ау тапэкIэ Iофыр зэрэлъыкIотэщтыр къэшIэгъуае.
Джащ фэдэу цIыфхэм IофшIэпIэ чIыпIэхэр ягъэгъотыгъэнхэм, лэжьапкIэм итын епхыгъэ Iофыгъохэм Премьер-министрэм игуадзэ къащыуцугъ.
АР-м экономикэ хэхъоныгъэмкIэ ыкIи сатыумкIэ иминистрэу ЛIыхэсэ Махьмудэ къызэриIуагъэмкIэ, непэрэ уахътэм экономикэр зыпкъ ит. Ау кризисым къыхэкIыкIэ, цIыфхэм ахъщэ федэу къаIэкIахьэрэм, лэжьапкIэм къащыкIагъ. Джащ фэдэу банкхэм чIыфэ къаIыпхыныр нахь къин хъугъэ, анахьэу мы гумэкIыгъом еуалIэхэрэр предпринимательствэм ыкIи бизнесым ахэщагъэхэр арых.
— Экономическэ къиныгъохэм ялъэхъан республикэм имуниципальнэ образованиехэм ащызэхатщэщтыгъэ ермэлыкъхэм къафэдгъэзэжьын фае. ТицIыфхэр социальнэу къэухъумэгъэнхэм, ахэм ящыкIэгъэ гъомылапхъэхэр, продукциер нахь пыутэу зэрагъэгъотынхэмкIэ яшIогъэшхо къэкIощт, — къыIуагъ КъумпIыл Мурат.
КIэлэцIыкIу IыгъыпIэм кIон фэе сабыйхэу илъэси 3 — 7 зыныбжьыхэм алъэныкъокIэ чэзыу зэрэщымыIэжьыр къыIуагъ министрэу Хъуажъ Аминэт. Министерствэм нэмыкI лъэныкъохэмкIэ Iофэу ышIэрэм, пшъэрылъ шъхьаIэхэм пащэр къатегущыIагъ.
Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтхэмкIэ и Министерствэ ипащэу Валерий Картамышевым анахьэу ынаIэ зытыридзагъэр унэгъо ыкIи специалист ныбжьыкIэхэм, зянэ-зятэ зимыIэжьхэм псэупIэхэр ягъэгъотыгъэнхэм, жъы дэдэ хъугъэ унэхэм ащыпсэухэрэр гъэкощыгъэнхэм япрограммэхэр республикэм зэрэщагъэцакIэхэрэр ары. АР-м и Правительствэ Iофэу ышIагъэм ишIуагъэкIэ, илъэсэу икIыгъэм итыгъэгъазэ МыекъуапэкIэ зянэ-зятэ зимыIэжь нэбгыри 109-мэ фэтэрыкIэхэр аратыгъэх. Программэм игъэцэкIэн къыдыхэлъытагъэу, джыри Мыекъопэ районым уни 2 кIэу щагъэпсы, мыщ фэдэ зы псэуалъэм ишIын джырэблагъэ Тэхъутэмыкъое районым щаухынэу агъэнафэ.
— Ны-ты зимыIэжьхэм ящыкIэгъэ псэупIэхэр ыпэкIэ афэтщэфыщтыгъэмэ, джы унакIэхэр тшIынхэр нахь тэрэзэу ыкIи федэу къыхэтхыгъ. Арышъ, а гъогум тытетэу Iоф тшIэщт, федеральнэ гупчэм къыгъэуцугъэ пшъэрылъхэр дгъэцэкIэщтых, — къыхигъэщыгъ Премьер-министрэм.
Гъогухэм ягъэцэкIэжьын, ЖКХ-м епхыгъэ Iофыгъохэм, нэмыкI лъэныкъохэми КъумпIыл Мурат къащыуцугъ. Бюджетым къытIупщырэ ахъщэр шIуагъэ къытэу гъэфедэгъэным мэхьанэшхо зэриIэр къэзэрэугъоигъэхэм джыри зэ агу къыгъэкIыжьыгъ. БлэкIыгъэ илъэсым изэфэхьысыжьхэм къатегущыIэзэ, социальнэ пшъэрылъхэр зэкIэ гъэцэкIагъэхэ зэрэхъугъэр анахь шъхьаIэу къыхигъэщыгъ. Ащ нэмыкIэу, республикэм ежь ихахъохэр сомэ миллион 400-м ехъукIэ нахьыбэ зэрэхъугъэр къэгъэлъэгъон дэгъоу ылъытагъ. Арэу щытми, экономикэм хэхъоныгъэхэр ышIынхэмкIэ IэпэчIэгъанэхэр джыри зэрэщыIэхэм, ахэр зэрифэшъуашэу гъэфедэгъэнхэ зэрэфаем кIигъэтхъыгъ.
АР-м финансхэмкIэ иминистрэу Долэ Долэтбый къызэриIуагъэмкIэ, муниципальнэ образованиехэм ябюджетхэр зэфэдиз шIыгъэнхэм фэшI сомэ миллион 360-рэ афатIупщыгъ. Илъэсэу тызыхэтым аштэгъэ бюджетыр гъэцэкIэгъэным, анахьэу социальнэ пшъэрылъхэр зэшIохыгъэнхэм анаIэ зэрэтырагъэтыщтыр министрэм къыIуагъ.
— УФ-м и Президент къыдигъэкIыгъэхэ жъоныгъокIэ унашъохэр гъэцэкIэгъэнхэр зэкIэмэ анахь шъхьаI. Ащ дакIоу экономикэм хэхъоныгъэхэр ышIынхэм фэIорышIэщт пшъэрылъхэр министерствэхэм, ведомствэхэм, къулыкъухэм зыфагъэуцужьыхэзэ, ахэр зэшIохыгъэнхэм лъыплъэнхэ фаех. ЦIыфэу къытэуалIэрэ пэпчъ игумэкIыгъо, игукъао зэхэтшIэнхэм ыкIи зэхэтфынхэм, амалэу тиIэмкIэ IэпыIэгъу тыфэхъуным мэхьанэшхо иI. Ар зыщышъумыгъэгъупш, — къыIуагъ кIэухым КъумпIыл Мурат.
ТХЬАРКЪОХЪО Адам.