Тыгъуасэ АР-м и ЛIышъхьэу ТхьакIущынэ Аслъан АР-м и Обще-ственнэ палатэ итхьаматэу Устэ Руслъан ригъэблэгъагъ. ЗэIу-кIэгъум хэлэжьагъ хэутын IофхэмкIэ, IэкIыб къэралхэм ащыпсэ-урэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым ипащэу Шъхьэлэхъо Аскэр.
АР-м и ЛIышъхьэ Общественнэ палатэм республикэмкIэ мэхьэнэ ин зэриIэр, Iофыгъо зэфэшъхьафыбэм язэшIохын, лъэпкъыбэу щыпсэухэрэм зэгурыIоныгъэрэ рэхьатныгъэрэ азыфагу илъынхэм, цIыфхэм ягумэкIыгъохэр дэгъэзыжьыгъэнхэм мымакIэу зэрахэлажьэрэр къыхигъэщыгъ.
2015-рэ илъэсэу икIыгъэм имэлылъфэгъу мазэ АР-м и Общественнэ палатэ ипащэу Устэ Руслъан агъэнэфагъ. Ащ къыщыублагъэу Iофэу ашIагъэм, анахь шъхьаIэу анаIэ зытырагъэтыгъэхэм, илъэсэу къихьагъэмкIэ гухэлъэу яIэхэм ЛIышъхьэр ащ щигъэгъозагъ. Пстэумэ апэу республикэм ипащэ АР-м и Общественнэ палатэ иIофшIэн къызэрэхэлажьэрэм, ишIуагъэ мымакIэу къызэраригъэкIыгъэм афэшI «тхьауегъэпсэу» риIуагъ. Нэужым къытегущыIагъ пстэумкIи нэбгырэ 30 непэ палатэм зэрэхэтым, общественнэ организацие 25-рэ ащ зэрепхыгъэм. БлэкIыгъэ илъэсым имэлылъфэгъу мазэ къыщыублагъэу пленарнэ зэхэсыгъуищ яIагъ. Ахэм ащыщэу тIумэ АР-м и МВД кIэщакIо афэхъугъ. Зыныбжь имыкъугъэхэм бзэджэшIагъэу зэрахьэрэм, тигъогухэм хъугъэ-шIагъэу атехъухьэхэрэм, ахэм ахэкIуадэхэрэм япчъагъэ нахьыбэ зэрэхъугъэр ары Iофыгъо шъхьаIэу къащаIэтыгъэхэр. Ау ахэм анэмыкI гумэкIыгъохэми палатэр ахэплъагъ. Ащ фэдэу ащ ипащэ зигугъу къышIыгъэхэм ащыщых диспансеризацием цIыфхэр макIэу зэрэхэлажьэхэрэм иIофыгъо, туризмэм зегъэушъомбгъугъэным ыкIи тарихъ культурнэ кIэным икъэухъумэн яIофхэр.
Республикэм ипащэ а зэпстэури лъэшэу узыгъэгумэкIын ыкIи нахь чанэу Iоф зыдэшIэгъэн фаеу зэрэщытыр къыхигъэщыгъ.
— Мыхэм алъэныкъокIэ Iофхэр нахьышIу хъунхэмкIэ Общественнэ палатэм мымакIэу ишIуагъэ къыгъэкIон зэрилъэкIыщтым тицыхьэ телъ, — къыIуагъ ащ. — ХэкIыпIэу шъулъэгъухэрэр жъугъэнэфэнхэу, ахэм афэгъэзагъэхэм алъыжъугъэIэсынхэу тышъущэгугъы.
АР-м и Общественнэ палатэу организацие 25-рэ зэзыпхырэм республикэм чIыпIэ гъэнэфагъэ зэрэщиубытырэр, лъэпкъ зэфыщытыкIэхэр гъэпытэгъэнхэм, рэхьатныгъэ илъыным, Iофыгъо зэфэшъхьафхэм язэшIохын ащ иIахь мымакIэу зэрахилъхьэрэр Шъхьэлэхъо Аскэр къызэгущыIэми къыхигъэщыгъ.
Устэ Руслъанэ къызэриIуагъэмкIэ, Урысыем исубъектхэм яобщественнэ палатэхэм блэкIыгъэ илъэсым Iофэу ашIагъэр зызэфахьысыжьым, АР-м и Общественнэ палатэ анахь чанхэм ащыщэу алъытагъ ыкIи ащ фэдэхэр зыщагъэнэфэхэрэ тхылъым дагъэхьагъ. Илъэсэу къихьагъэми яIофшIэн къызэрэщамыгъэкIэщтыр, анахь шъхьаIэу Iоф зыдашIэщтхэмкIэ гухэлъ гъэнэфагъэхэр зэряIэхэр, охътэ благъэм зэхащэщт пленарнэ зэхэсыгъом ахэр зэрэщагъэнэфэщтхэр къыIуагъ.
АР-м и ЛIышъхьэ лъэныкъо пстэумкIи Общественнэ палатэм яшIуагъэ рагъэкIыным зэрэфэхьазырхэм кIигъэтхъыгъ.
ХЪУТ Нэфсэт.