Социальнэ IофышIэм лъытэныгъэу фашIырэм зыкъегъэIэтыгъэным, нэжъ-Iужъхэм, сэкъатныгъэ зиIэхэм, чIыпIэ къин ифэгъэ унагъохэм Iоф адэшIэгъэнымкIэ опытэу щыIэр ныбжьыкIэхэм нахь агъэфедэ хъуным фытегъэпсыхьагъэу илъэс къэс тикъэралыгъо щэкIо социальнэ учреждение анахь дэгъур къыхэхыгъэнымкIэ зэнэкъокъу.
ЦIыфхэм социальнэ фэIо-фашIэхэр афэгъэцэкIэгъэнхэмкIэ Адыгеим иучреждениехэм ялIыкIохэри аужырэ илъэситфым финалым нэсых, текIоныгъи къыдахы.
Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ ипресс-къулыкъу къызэритырэмкIэ, Всероссийскэ зэнэкъокъум «Социальнэ фэIо-фашIэхэр зыгъэцэкIэрэ учреждением иIофышIэ анахь дэгъу» зыфиIорэ номинациемкIэ къыхагъэщыгъ цIыфхэм социальнэ фэIо-фашIэхэр афэгъэцэкIэгъэнхэмкIэ Красногвардейскэ комплекснэ гупчэм испециалистэу Къудаикъо Аминэт.
Аминэт иIофшIэн мы системэм зыщыригъэжьагъэр 2002-рэ илъэсыр ары. Щытхъу хэлъэу ипшъэрылъхэр зэригъэцакIэрэм фэшI мызэу, мытIоу хагъэунэфыкIыгъ. ИIофшIэн шъхьаIэ имызакъоу, районым иобщественнэ щыIакIи Аминэт иIахьышIу хелъхьэ. Илъэсищ хъугъэу ар республикэ спартакиадэу «Опсэу!» зыфиIоу ныбжь хэкIотагъэ зиIэхэм афызэхащэрэм игъэхьазырын чанэу хэлажьэ. Ары къэс Красногвардейскэ районым икомандэ хагъэунэфыкIырэ чIыпIэ къыдехы.
Урысыем щыкIогъэ зэнэкъокъум текIоныгъэ къызэрэщыдихыгъэм фэшI УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ шIухьафтын Аминэт къыфишIыгъ.
(Тикорр.).