Гурыт еджапIэр къэзыухырэ кIэлэеджакIохэм зэтыгъо къэралыгъо ушэтынхэр атынхэмкIэ фитыныгъэ къязытырэ сочинением (изложением) итхын гъэрекIо къыщегъэжьагъэу шIокI имыIэ хъугъэ.
Мыгъэ гурыт еджапIэр къэзыухыхэрэм ар тыгъэгъазэм и 2-м атхыгъ, зэфэхьысыжьхэм къызэрагъэлъэгъуагъэмкIэ, зэрифэшъуашэу республикэм ар щыкIуагъ.
Мыекъопэ гурыт еджапIэу N 15-м урысыбзэмрэ литературэмрэ щязыгъэхьырэ, Урысые Федерацием гъэсэныгъэм иIофышIэ гъэшIуагъэу Л.А. Ручкинам къызэриIорэмкIэ, зэтыгъо къэралыгъо ушэтынхэр атынхэмкIэ фитыныгъэ къязытырэ сочинениер къызыхагъахьэм, кIэлэегъаджэхэри, кIэлэеджакIохэри ащ лъэшэу ыгъэщтэгъагъэх. Арэу щытми, бэ темышIэу ащ есагъэх. Сочинением итхын шIогъэ гъэнэфагъэ зэрэпылъыр кIэлэегъаджэм къыхигъэщыгъ. Хэукъоныгъэ имыIэу кIэлэеджакIохэр тхэнхэм зэрэфищэхэрэм нэмыкIэу, лъэныкъо зэфэшъхьафхэмкIэ гупшысэ тэрэзхэр яIэнхэм фегъасэх.
Адыгэ республикэ гимназием урысыбзэмрэ литературэмрэкIэ икIэлэегъаджэу, УФ-м гъэсэныгъэмкIэ иIофышIэ гъэшIуагъэу С. Нэгъаплъэм сочинением итхын къызэрэхагъэхьагъэм дырегъаштэ ыкIи ащ ишIуагъэкIэ кIэлэеджакIохэм яшIэныгъэ зэрэхагъахъорэр къыхегъэщы. Ащ къызэриIуагъэмкIэ, 2015 — 2016-рэ еджэгъу илъэсым гурыт еджапIэр къэзыухырэ кIэлэеджакIохэм зызэраушэтырэ темэхэмкIэ непэрэ мафэмкIэ гумэкIыгъоу щыIэхэр къэпIэтынхэ, гупшысэ гъэнэфагъэхэр сочинением (изложением) хэплъхьанхэ плъэкIыщт.
Шъыпкъэ, Рособрнадзорым къыхихыгъэ темитфыми непэрэ щыIэныгъэм чIыпIэ гъэнэфагъэ щаубыты. Зэрэкъэралыгъоу зэфэдэу «Уахътэм», «Унэм», «ШIулъэгъум», «Гъогум», «Литературэм и Илъэс» афэгъэхьыгъэ лъэныкъохэр ары ныбжьыкIэмэ зызэраушэтыгъэр.
Гурыт еджапIэр къэзыуххэрэм янахьыбэм шIулъэгъуныгъэм къытегущыIэнхэр ары къыхахыгъэр. «Какие качества раскрывает в человеке любовь!» зыфиIорэ темэмкIэ кIэлэеджакIохэм япроцент 54-м заушэтыгъ. «Что дом может рассказать о своем хозяине?» — процент 17,3-мэ, «Согласны ли Вы с мыслью, что жизненный путь — это постоянный выбор?» — процент 14,8-мэ, «Чтение литературного произведения — труд или отдых?» — проценти 10,4-мэ, «Когда хочется остановить мгновение?» зыфиIорэр проценти 3,6-мэ къыхахыгъэх.
ЗэкIэмкIи мы илъэсым гурыт еджапIэр къэзыухырэ нэбгырэ 1494-мэ сочинение (изложение) атхыгъ. Ахэм ащыщэу процент 99-мэ зэрифэшъуашэу заушэтыгъ ыкIи «зачет» къахьыгъ.
«Незачет» зиIэ ныбжьыкIэхэмрэ ушъхьагъу зэфэшъхьафхэмкIэ ушэтыным къэмыкIуагъэхэмрэ сочинениер (изложениер) икIэрыкIэу мэзаем и 3-м ыкIи жъоныгъуакIэм и 4-м атхыжьын амал яIэщт.
(Тикорр.).