ЯгумэкIыгъо зэшIуахынэу агъэгугъагъэх

Кощхьэблэ районым ит псэ­упIэу Шелковниковым гъэстыныпхъэ шхъуантIэр къыратыным фэгъэхьыгъэ гумэкIыгъоу щыIэхэм общественнэ движениеу «Народнэ фронтым» ишъо­лъыр къутамэу Адыгеим щыIэм ынаIэ атыридзагъ. Ахэм зэрэ­зэхафыгъэмкIэ, гъэстыныпхъэ шхъуантIэр мыщ щыпсэухэрэм къаратыным фэгъэхьыгъэ Iоф­шIэнхэр 2015-рэ илъэсым иIоныгъо мазэ рагъэжьагъэх. Ахэр тыгъэгъазэм аухынхэу щытыгъ, ау непэ нэси цIыфхэр зыщыпсэурэ унэхэр къагъэплъыхэрэп.

IMG_7827БлэкIыгъэ илъэсым ишэкIогъу мазэ къыщегъэжьагъэу псэупIэм дэс цIыфхэр гъэстыныпхъэ шхъуантIэр къызщаратыщт уахътэм ыгъэгумэкIыщтыгъэх. Район администрацием зыфа­гъазэ­щтыгъ, ау IофшIэнхэр графикым тетэу кIохэу ыкIи ащ ит уахътэм ехъулIэу ара­гъэгъо­тынэу къараIощтыгъ. Ты­гъэгъэзэ мазэм ехъулIэу гъэстыныпхъэр къаратыным щыгугъыгъэ цIыф­хэм пхъэ зэрагъэ­гъотыгъэп, яунэхэр кIымафэм агъэфэбэнхэм зыфагъэхьазырыгъэп. Къы­зэрэчIэкIыгъэмкIэ, псэупIэм дэсхэр зэнэгуя­гъэхэр хъугъэ: гъэстыныпхъэ шхъуан­тIэр игъом къафыпагъэнагъэп ыкIи унэхэр чъыIэхэу илъэсы­кIэм пэгъокIы­гъэх.

Шелковниковым щыпсэухэрэм общественнэ движениеу «Народнэ фронтым» зыфагъэ­загъ IэпыIэгъу къафэхъунэу. Iофыр зэхэзыфынхэу поселкэм кIогъэ «фронтовикхэм» мы­лым фэдэу дэпкъхэр зэрэды­къыгъэхэр, чъыIэшхо унэхэм зэрарытыр къаушыхьатыгъ. ЦIыфхэр пылъых электропри­борхэмкIэ загъэфэбэнэу. Уп­лъэкIунхэр зыщашIыгъэ мафэм унэхэм анахьи щагур нахь фэбагъ.

— Амыгъэплъыхэрэ унэхэм цIыфхэр кIымафэм ащыпсэунхэу щытэп. ГумэкIыгъоу къэуцугъэр охътэ кIэкIым къыкIоцI зэшIохыгъэ хъуным фэшI зэкIэ тшIэщт. АщкIэ хабзэр IэпыIэгъу къытфэхъунэу тэгугъэ, — къы­Iуагъ общественнэ движениеу «Народнэ фронтым» ишъо­лъыр къутамэу Адыгеим щыIэм итхьамэтэгъоу Анатолий Лелюк.

ГЪОНЭЖЬЫКЪО Сэтэнай.