ИлъэсыкIэу къихьагъэм псэупIэ-коммунальнэ фэIо-фашIэхэм алъэныкъокIэ джыри «хахъохэр» къызыдихьыгъэх, ау мызыгъэгум ахэр зэкIэми анэсыщтхэп. Псэу агъэфедагъэр къэзылъытэрэ приборхэр зымыгъэуцугъэхэр ары гумэкIыгъохэр зиIэ хъущтхэр. Илъэсэу къихьагъэм ищылэ мазэ и 1-м къыщыублагъэу ахэм проценти 10-кIэ нахьыбэу псым ыпкIэ атыщт.
СчетчикымкIэ къэмылъытагъэу, шэпхъэ гъэнэфагъэу (нормативэу) щыIэхэмкIэ зытырэр нахьыбэ къэс, нэмыкIхэмкIэ ащ зэрарэу хэлъым хэхъо. Шапхъэу щыIэм зыпари къылъымыплъэу узыфаем фэдиз псы бгъэкIодымэ, етIанэ нэбгырэ пчъагъэу унэм итхагъэм телъытагъэу ащ ыпкIэ оты. ХэткIи шъэфэп, унэхэм янахьыбэм арытхагъэм къехъоу зэращыпсэурэр. ЗэрэхъурэмкIэ, имытхагъэхэм агъэфедагъэр зыпарэми къылъытэрэп. Фэтэрыбэ хъурэ унэм псэу щагъэфедагъэр шапхъэхэм зашIокIыкIэ, а къехъугъэм ыпкIэ зэкIэ унэм чIэсхэм атегощагъэ мэхъу. Ары шапхъэм ехъоу унэм щагъэфедэрэм коэффициентхэр техъонхэр къызкIаугупшысыгъэр.
АР-м уасэхэмрэ ахэм ягъэнэфэнрэ къэралыгъо екIолIа-кIэ яIэным лъыплъэрэ и ГъэIорышIапIэ къызэритыгъэмкIэ, Адыгеим щыпсэухэрэм япроцент 40-м ехъумэ псэу агъэфедэрэм ыпкIэ проценти 10-кIэ нахьыбэу атын фаеу мэхъу, сыда пIомэ ащ фэдиз-мэ приборхэр яунэхэм арагъэуцуагъэхэп. Шапхъэхэм коэффициентэу атехъорэм къыщыкIэщтэп, хэхъощт нахь. Непэ ар 1,5-мэ зэрэхъурэр, 2017-рэ илъэсым икъихьагъум нэс 1,6-м нэсыщт. Ар псэу агъэфедагъэр къэзылъытэрэ приборхэр зи-мыIэхэм лъэшэу зэхашIэщт. Арышъ, охътэ благъэм ахэр зимыIэхэм япчъагъэ нахь макIэ хъунэу мэгугъэх.