Ощхыр нахьыбэщт

Мы кIымэфэ уахътэм ом бэрэ зызэрэзэрихъокIыщтыр синоптикхэм пэшIорыгъэшъэу къатыгъагъ ыкIи ахэр зэрэхэмыукъуагъэхэр природэм къыушыхьатыжьыгъ.

img-20141219171534-321КIымафэм иапэрэ мазэ чъыIагъэу пIоным пэчыжьагъ, илъэсыкIэр къызщихьащтым ыкIи къихьагъэм иапэрэ мафэхэм Урысыем икъыблэ шъолъыр зэхапшIэу къыщыу­чъыIыгъ, температурэр градус 22-м нэсэу ехыгъэуи къыхэ­кIыгъ, къыщесыгъ ыкIи щыщ­тыргъукIыгъ. Гупчэ шъолъырэу ащ фэдэ уахътэм нахь зыщы­чъыIэщтыгъэм, кIымафэм имыфэшъуашэу щыфэбагъ. Илъэсэу къихьагъэм иапэрэ тхьамафэ зытекIым, зы чэщ-зы­мафэкIэ температурэр хэпшIы­кIэу дэкIоягъ, ащ къыкIэлъы­кIуагъэхэр гъэтхэ уахътэм нахь фэогъадэх. Мы мафэхэм Урысыем икъыблэ шъолъыр ичIы­пIабэм фабэр гурытымкIэ лъытагъэу градуси 10 — 12-м ащынэсы, ау Гупчэ шъолъырым кIымафэм зэрэфэлъэкIэу ишэн къыщегъэлъагъо.

Ащ фэдэу псынкIэу ом зызэрэзэблихъурэм лъэныкъо зэфэшъхьафхэмкIэ иягъэ къэ­кIо. ГущыIэм пае, псауныгъэм­кIэ ар мыдэгъоу медицинэм къеты, мэкъумэщышIэхэри ащ фэдэ зэблэхъунхэм агъэгушIо­хэрэп. Синоптикхэм мазэкIэ ыпэ ишъхэзэ ор зыфэдэщтыр теубытагъэу къаIон зэрамылъэ­кIыщтыр къыхагъэщы, арэу щытми, пэшIорыгъэшъ прогнозхэр къашIых. Мы илъэсым ищылэ мазэ бэрэ къесыщтэу, ощх-осэу къехыщтыр шапхъэхэми ашIокIыщтэу нахьыбэм къаты, ау осыр Урал лъэныкъом, Поволжьем ыкIи Сыбыр нахь ащыбэщтэу ары къызэраIорэр. Тишъолъыр осым ыгъэгушIонэу зыпарэми къыIогорэп.

Адыгеир пштэмэ, синоптикхэм къызэратырэмкIэ, мы мазэм ыкIи къихьащт мэзаем иапэрэ мэфипшI къакIоцI нахьыбэу къыщещхыщт. Щылэ мазэм и 20 — 21-м адэжь макIэу къесынэу, температурэр градуси 2 — 4-у ехынэу агъэунэфыгъэу зыхэм къаIо, нэмыкIхэм осыр нахьыбэнэу къаты. Ау чъыIэри бэрэ ымы­Iыгъыщтэу, нахьыбэрэмкIэ фэбэщтэу, градуси 10 — 13-м нэсэу дэкIоещтэу зэдырагъа­-штэ.

Шъыпкъэу пIощтмэ, пэшIо­рыгъэшъ прогнозхэм узыгъэгу­шIонышхо ахэтэп, ау мафэ къэс ахэм зэхъокIыныгъэхэр зэрафэхъухэрэм, мэфэ зы­тIущым шIокIыгъэу къатыгъэмрэ зыкъызэригъэлъагъорэмрэ зэрэзэтемыфэжьыхэрэм кIымафэр ифэшъуашэм тетэу лъыкIотэнэу, джыри кытфесынэу, къэучъы­Iынэу уегъэгугъэ.

 ХЪУТ Нэфсэт.