Хэбзэгъэуцугъэм къызэрэдилъытэу, цIыфэу илъэс 40-рэ ыкIи ащ нахьыбэрэ Iоф зышIагъэхэм, ведомственнэ шIухьафтынхэр (УрысыемкIэ) зиIэхэм «IофшIэным иветеран» зыфиIорэ щытхъуцIэр афагъэшъуашэ.
Ащ фэгъэзэгъэ комиссие щызэхащагъ Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ. Мазэ къэс зэхэсыгъо зиIэрэ комиссием хэхьэх финансхэмкIэ Министерствэм, АР-м и ЛIышъхьэ ыкIи министрэхэм я Кабинет я Администрацие, ветеранхэм я Совет, республикэм ипрофсоюзхэм я Федерацие ялIыкIохэр.
ИкIыгъэ илъэсым комиссием аужырэ зэхэсыгъоу иIагъэм нэбгыри 169-мэ ятхылъхэр рахьылIэгъагъэх, «IофшIэным иветеран» щытхъуцIэр зыфагъэшъошагъэр нэбгырэ 99-р ары.
Мы щытхъуцIэр зиIэхэм социальнэ IэпыIэгъоу аратырэм фэдэ аIукIэнэу нэбгырэ 54-рэ комиссием къыхихыгъ. Ахэм илъэс 40-рэ е ащ нахьыбэрэ зэпымыоу Iоф ашIагъ. Нэбгырэ 16-мэ ятхылъхэр хэбзэгъэуцугъэм ишапхъэхэм адимыштэхэу зэкIагъэкIожьыгъэх.
Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ ипресс-къулыкъу къызэритырэмкIэ, икIыгъэ илъэсым нэбгырэ 1775-мэ ятхылъхэр комиссием къырахьылIагъэх. Ахэм ащыщэу 884-мэ «IофшIэным иветеран» зыфиIорэ щытхъуцIэр афагъэшъошагъ.
Мыхэм ыкIи фэгъэкIотэныгъэу яIэхэмкIэ ахэм арагъэпшэгъэ нэбгырэ 810-мэ мылъкоу апэIухьащтыр республикэ бюджетым къыхагъэкIы.
(Тикорр.).