Къэралыгъом игъунапкъэ иухъумэкIо ветеранхэм яреспубликэ Совет блэкIыгъэ илъэсым итыгъэгъазэ иIэгъэ зэхэсыгъом илъэсым Iоф зэрашIагъэм къыгъэлъэгъуагъэхэр щызэфахьысыжьыгъэх, мы илъэсым телъытэгъэ гухэлъхэр щагъэнэфагъэх.
Советым итхьаматэу И. Давидюк илъэсым Iоф зэрашIагъэм къытегущыIэзэ зэрэхигъэунэфыкIыгъэмкIэ, блэкIыгъэ илъэсым телъытэгъэ пшъэрылъхэу зыфагъэуцужьыгъагъэхэм яанахь Iофыгъо шъхьаIэу щытыгъ Хэгъэгу зэошхом ТекIоныгъэр къызыщыдахыгъэр илъэс 70-рэ зэрэхъурэм зыфэгъэхьазырыгъэныр ыкIи зэрифэшъуашэу гъэмэфэкIыгъэныр. Ащ елъытыгъэу анахьэу анаIэ зытырагъэтыгъэхэр заом иветеранхэм, тылым щылэжьагъэхэм, заом ыкIи Iэшэ зэIуупIэныгъэхэм ахэкIодагъэхэм яшъхьэгъусэхэм, сэкъатныгъэ зиIэхэм Iоф адэшIэгъэныр ары. Джащ фэдэу зыщагъэгъупшагъэхэп къэралыгъом игъунапкъэ иухъумакIохэм яныбджэгъу ныбжьыкIэхэм (ЮДП-м) Iоф адэшIэгъэныр. Советым хэтхэр ахэм ренэу IэпыIэгъу афэхъущтыгъэх.
МэфэкI мафэхэм, къызыхъугъэхэ мафэхэм ыкIи мэфэ къызэрыкIохэм Советым хэтхэр ветеранхэм адэжь кIощтыгъэх, афэгушIощтыгъэх, нэпэеплъ шIухьафтынхэр афахьыщтыгъэх, япсауныгъэ изытет зэрагъашIэщтыгъ.
Джащ фэдэу ветеранхэм я Совет зэрялъэIугъэм ишIуагъэкIэ, майорэу Седовым ишъхьэгъусэу Е. Сячинам иунашъхьэ фызэблахъугъ, илъэс 60-м ехъугъ ар замыгъэкIэжьыгъагъэр, ренэу къыкIэщхыщтыгъ.
Юг-Инвест банкым ипащэхэр яIэпыIэгъухэу жъоныгъуакIэм ТекIоныгъэр къызыдахыгъэр илъэс 70-рэ зэрэхъурэм ипэгъокIэу кIэлэцIыкIу творчествэм ехьылIэгъэ викторинэ зэхащэгъагъ. Ар заух ужым номинациехэм, ныбжьым атегъэпсыкIыгъэу кIэуххэр зэфахьысыжьыгъагъэх, викторинэм хэлэжьэгъэ пстэуми щытхъу тхылъхэр аратыгъагъэх.
Советым итхьаматэ агу къыгъэкIыжьыгъ я Устав зэригъэнафэрэм тегъэпсыкIыгъэу IофшIэныр зэрэзэхащэщтыгъэр. Агъэнэфэгъэ Iофыгъо пстэуми Советым изэхэсыгъохэм ащатегущыIэщтыгъэх, игъэкIотыгъэ зэхэсыгъохэри зэхащэхэу къыхэкIыщтыгъ. Зэхэсыгъохэм ветеран организацием исатырхэр гъэкъэбзэгъэнхэм ехьылIэгъэ Iофыгъор къащаIэтэу къыхэкIыгъ. ГущыIэм пае, Уставым ыгъэнэфэрэ шапхъэхэр амыгъэцакIэхэу алъыти, нэбгырэ 25-рэ ветеран организацием хагъэкIыгъагъ. Мы лъэхъаным зэкIэмкIи ветеран организацием нэбгырэ 68-рэ хэт.
Ветеран организацием иIофшIэнрэ ищыIакIэрэ яхьылIэгъэ тхыгъэхэр гъэзетхэм, адыгабзэкIэ къыдэкIырэр зэрахэтэу, къыхягъэутыгъэнхэм ренэу анаIэ тырагъэтыщтыгъ. Тхыгъэ 46-у редакциехэм афагъэхьыгъэхэм ащыщэу 40-р къыхаутыгъ.
Советым хэтхэр гурыт еджапIэхэм, лицейхэм ащыIэщтыгъэх, кIэлэеджакIохэм зэдэгущыIэгъухэр адашIыщтыгъ, пIуныгъэ IофшIэным яIахьышIу хашIыхьэщтыгъ. 2016-рэ илъэсым Iоф зэрашIэщт шIыкIэм, Iофыгъо шъхьаIэу щытхэм ягугъу къышIызэ, Советым итхьаматэ къыIуагъ ыпэкIэ зэрэщытыгъэм фэдэу агъэнэфэгъэ Iофыгъо пстэуми язэшIохын акIуачIэ зэрэрахьылIэщтыр, лъэкIэу яIэм тегъэпсыкIыгъэу ветеранхэм, ветеранхэм яшъузхэу зизакъоу къэнагъэхэм, сэкъатныгъэ зиIэхэм IэпыIэгъу афэхъущтых, къыткIэхъурэ ныбжьыкIэхэм пIуныгъэ IофшIэн адызехьэгъэным, джащ фэдэу уахътэм къыгъэуцурэ нэмыкI Iофыгъохэм язэшIохын зэралъэкIэу ахэлэжьэщтых.
СЭХЪУТЭ Нурбый.