Атыщтыр ызыныкъу

Унэ зэтетхэм ягъэцэкIэжьынрэ ягъэкIэжьынрэ апэIухьэрэ ахъщэр тилъэхъан хабзэм къытIупщыжьырэп. ЦIыфхэм ар къаугъоиныр къин къащэхъу. Ахэм ягъотхэр зэрэмыинхэм къыхэкIэу, УрысыемкIэ псэупIэ Кодексым ия 169-рэ статьярэ хэбзэгъэуцугъэу «Урысые Федерацием сэкъатныгъэ зиIэ цIыфхэр социальнэу къыщыухъумэгъэнхэм пае» зыфиIорэмрэ зэхъокIыныгъэхэр афашIыгъэх. Ахэм 2016-рэ илъэсым иапэрэ мафэ къыщегъэжьагъэу кIуачIэ яIэ хъугъэ.

2Хэта хэбзэ IэпыIэгъу къызфатIупщыщтхэр? Мы Iофыгъом Къэралыгъо Думэм щэуцугъо щыхэплъагъэх. Апэрэм зи­гъот мэкIэ цIыфхэм ащыщэу ахъщэ IэпыIэгъу къызфатIупщынэу къыхахыгъагъэр мэкIэ дэд. ЯтIонэрэ еджэгъум зыныбжь илъэс 70-рэ ыкIи 80 хъугъэхэри къыхагъэхьагъэх. Сэкъатныгъэ зиIэ цIыфхэри ащыгъупшагъэх.

Унэ зэхэтэу зыщыпсэухэрэм язэтегъэпсыхьажьын пэIуа­гъэхьанэу атырэ ахъщэм щыщэу ызыныкъо (процент 50-р) къызфыщагъэкIагъэхэм ащыщых:

зыныбжь илъэс 70-рэ хъугъэу зизакъоу псэурэ цIыфхэр;

зыныбжь илъэс 70-рэ хъугъэу Iоф зымышIэрэ пенсионер нэмыкI зиунагъо имысхэр;

сэкъатныгъэ зиIэ цIыфхэу апэрэ ыкIи ятIонэрэ группэ къызэратыгъэхэр;

сабый сэкъатхэр;

сабый сэкъат зиIэ унагъохэр.

Ахъщэ зымытыхэщтхэр:

илъэс 80, 90-рэ ыкIи нахьыбэ хъугъэхэу зизакъоу псэурэ цIыфхэр.

Зигугъу къэтшIыгъэ пенсионерхэмрэ сэкъатныгъэ зиIэ цIыфхэмрэ ахъщэ Iахьэу атыщтыгъэм къафыщагъэкIэным фэшI ятхылъхэр аIыгъхэу цIыфхэр социальнэу къэухъумэгъэн­хэмкIэ чIыпIэ къулыкъухэм (собесхэм) якIолIэнхэ фае.

Уасэхэр  къаIэтыгъэх

Щылэ мазэм къыщегъэжьагъэу унэ зэтетхэм ащыпсэурэ цIыфхэм зэдыряеу ахэм ахэт чIыпIэхэр рагъэцэкIэжьынхэу мазэ къэс атырэ ахъщэм къыхэхъуагъ. Ар зыфэдизыщтыр Адыгэ Республикэм иминистрэхэм я Кабинет къыIуагъ.

2016-рэ илъэсыр екIыфэкIэ унэ зэхэтэу лифтхэр зыщамыгъэфедэхэрэм ачIэс цIыфхэм япсэупIэ иинагъэ елъытыгъэу зы квадрат метрэ пэпчъ соми 4-рэ чапыч 93-рэ атыщт. Лифтхэр зыхэт унэхэм ащыпсэухэрэм квадрат метрэ пэпчъ соми 6-рэ чапыч 27-рэ атыщт.

Шъаукъо Аслъангуащ.