Урысыем и Прокуратурэ зызэхащагъэр илъэс 294-рэ зэрэхъурэм фэгъэхьыгъэ Iофтхьэбзэ игъэкIотыгъэр бэмышIэу Урысые Федерацием и Генеральнэ прокуратурэ щыкIуагъ.
Зэхэсыгъом хэлэжьагъэх Урысые Федерацием и Генеральнэ прокурорэу Юрий Чайка, Урысыем и Президент и Администрацие ипащэу Сергей Ивановыр, Федеральнэ ЗэIукIэм и Къэралыгъо Думэ и Тхьаматэу Сергей Нарышкиныр, Урысые Федерацием и Правительствэ и Тхьаматэ игуадзэу Дмитрий Козак, Федеральнэ ЗэIукIэм ФедерациемкIэ и Совет конституционнэ законодательствэмкIэ ыкIи къэралыгъо гъэпсынымкIэ и Комитет и Тхьаматэу Андрей Клишас, Генеральнэ прокурорым игуадзэхэр, Урысыем ипрокуратурэ икъулыкъухэм яветеранхэр, Урысые Федерацием и Генеральнэ прокуратурэ игупчэ аппаратрэ, дзэ прокуратурэ шъхьаIэмрэ яIофышIэхэр, шъолъырхэм япрокурорхэр, Адыгэ Республикэм ипрокурорэу Пословский Василий Митрофан ыкъор.
Урысые Федерацием и Генеральнэ прокурорэу Юрий Чайка шIуфэс псалъэ зэхэсыгъом къыщишIыгъ, ясэнэхьат епхыгъэ мэфэкIымкIэ прокуратурэм иIофышIэхэм къафэгушIуагъ.
Прокуратурэм икъулыкъухэм яIофышIэхэу анахьэу гъэхъагъэ зышIыгъэхэм къэралыгъо, ведомствэ наградэхэр къафагъэшъошагъэх.
Урысые Федерацием и Президент 2015-рэ илъэсым тыгъэгъазэм и 28-м ышIыгъэ УказымкIэ Адыгэ Республикэм ипрокурорэу, юстициемкIэ къэралыгъо советникэу я 2-рэ класс зиIэ Пословский Василий Митрофан ыкъом щытхъуцIэу «Урысые Федерацием ипрокуратурэ изаслуженнэ IофышI» зыфиIорэр къыфагъэшъошагъ. А щытхъуцIэр Урысыем икъэралыгъо наградэу алъытэ.