ШIукIэ тыгу къинэщт

«Укъызалъфым пстэури гу­шIуагъэ, узылIэжьыкIэ зыфэбгъэгъышъущтхэмэ», — адыгэ гущыIэжъэу бэрэ зэхэтхырэм имэхьанэ нахь зэхэошIэ цIыфым идунай ыхъожьыгъэу, ащ ихьэ­дагъэ ухэт зыхъукIэ.Сафиет Нарычэ ЦIыфыр щэIэфэ гъогоу къыкIурэм, ишэн-гъэпсыкIэхэм, шIоу ышIэрэм, шIулъэгъуныгъэ-гуфэбагъэу нэ­мыкI­хэм апигъохрэм елъытыгъэу ежьыми къыдэзекIожьых, дахэу агъэкIотэжьы, дунаим изы нэф остыгъэу агухэм къарэ­нэжьы.

БэмышIэу, мэзаем и 26-м, дунаим ехыжьыгъэ Абыдэ Сафият Нарыч ыпхъум джащ фэдэ лъэуж дахэ къыгъэнагъ. Ар цIыфмэ афэлэжьагъ, цIыфмэ апае щыIагъ, игъашIэ афигъэ­шъошагъ. Iоныгъом и 15-м 1935-рэ илъэсым къуаджэу Лахъщыкъуае Сафият къыщы­хъугъ. Тэхъутэмыкъое гъомы­лэпхъэшI комбинатым илъэс щэ­кIым къехъурэ щылэжьагъ, Тэхъу­тэмыкъое сэнэшI заводым ибригадирэу Iоф ышIагъ. СССР-м икъэралыгъо орденэу «Знак Почета», медалэу «За доблестный труд» зыфиIохэрэр ыкIи щытхъу тхылъ пчъагъэхэр Сафият къылэжьыгъэх. Абыдэ Сафият плIэгъогогъо Тэхъутэмыкъое (Октябрьскэ) къоджэ Советым идепутатэу щытыгъ. 1992-рэ илъэсым пенсием кIуа­гъэ, IофшIэным иветераныгъ. ИIофшIакIэкIи изекIокIэ-шIы­кIэхэмкIи ар цIыфхэм къахэщыщтыгъ, ищытхъу къизыIо­ты­кIырэ тхыгъэхэр мызэу, мытIоу район ыкIи хэку гъэзетхэм къарыхьэщтыгъэх.

Абыдэ Сафият Нарыч ыпхъур зышIэщтыгъэхэм лъэшэу агу хэкIыгъ ащ идунай зэрихъо­жьыгъэр ыкIи ибын-унагъо, джащ фэдэу Абыдэмэ анахьы­жъэу къахэнэгъэ Абыдэ Хьисэ фэтхьаусыхэх. ЩымыIэжьым Тхьэм джэнэт лъапIэ къырет.

Ныбджэгъу куп.