ЗиIэтыжьыныр къехьылъэкIы

«Адыиф» Мыекъуапэ — «Звезда» Звенигород — 24:35 (13:23, 11:12).

DSC_0346Гъэтхапэм и 3-м Мыекъуапэ щызэдешIагъэх.

Зезыщагъэхэр: А. Будагов, Р. Ханмагомедов — Краснодар.

«Адыиф», къэлэпчъэIутхэр: Самарская, Ефимова, Баскакова; ешIакIохэр: Неупокоева, Лихач — 1, Серадская — 5, Черномурова — 2, Грбавчевич — 4, Исаченко — 7, Игнатченко, ШъэоцIыкIу — 3, Андреева — 1, Чешенко — 1, Косенкова, Головко.

«Адыифым» иешIакIэ тIэкIу нэмыIэми хигъэхъуагъ, ау «Звездам» фэдэ командэ лъэшхэм атекIоным фэхьазырэп. Ольга Исаченкэр, ШъэоцIыкIу Миланэ, Анастасия Черномуровар уащытхъунэу ешIагъэх. Анастасия Серадскаяр, Милица Грбавчевич, Виктория Самарскаяр, нэмыкIхэри яIэпэIэсэны­гъэкIэ къахэщых. «Адыифым» итренер шъхьа­Iэу Анатолий Скоробогатовыр хэкIыпIэхэм алъэхъуми, тикомандэ аужырэ чIыпIэр къыбгынэн ылъэкIыгъэп.

«Звездам» итренер шъхьаIэу Александр Реввэ «Адыифым» итренер шъхьаIэу зэрэщытыгъэр тщыгъупшагъэп. Ащ къызэрэ­тиIуагъэу, «Звездар» Европэм икубокхэм якъыдэхын фэбэнэн имурад. Урысыем ихэ­шыпыкIыгъэ командэ «Звездам» щыщэу нэбгыри 3 а­штагъ. «Адыифым» щешIэщтыгъэхэ Яна Усковар, Оксана Королевар непэ «Звездам» хэтых, яухьазырыныгъэкIэ анахь дэгъу­хэм ащыщых.

О. Королевамрэ Я. Усковамрэ гущыIэгъу тафэхъугъ. НэбгыритIуми «Адыифым» ешIэкIэ дахэу къыгъэлъагъощтыгъэр, Урысыем икомандэ анахь лъэшхэм зэратекIощтыгъэр шIукIэ агу къагъэкIыжьы.

ПэшIорыгъэшъ ешIэгъухэр «Адыифым» ыухыгъэх. Аужырэ чIыпIэм зэрэщыIэр тыгу къео. Ащ дакIоу, Анастасия Черномуровам, Виктория Туник, нэмыкIхэр «Адыифым» хэкIыжьынхэу загъэхьазыры. А. Черномуровар «Кубань» рагъэблэгъагъ.

Суперлигэм хэт командэхэм пэшIорыгъэшъ ешIэгъухэр шIэхэу аухыщтых, ащ ыуж медальхэм афэбэнэщтхэр зэIукIэщтых. «Адыифыр» ыкIи «Ставропольер» я 9-рэ, я 10-рэ чIы­­пIэхэм апае зэдешIэнхэу загъэхьазыры, ау медальхэр зыхьыщтхэм ахэхьанхэ алъэ­кIыщтэп.

Сурэтым итыр: «Адыифыр» «Звездам» дешIэ.

ЕМТIЫЛЪ Нурбый.