Урысые зэнэкъокъоу «Илъэсым иунагъу» зыфиIорэм текIоныгъэр къыщыдэзыхыгъэхэм Кремлым хэт Къэралыгъо Унэшхом шIу­хьаф­тынхэр щаратыжьыгъэх.

Ахэм ащыщ Адыгеим и Джэ­джэ район щыпсэухэрэ Ко­лесниковхэм яунагъо. «Унагъор — шэн-хабзэхэм яухъумакIу» зыфиIорэ лъэныкъомкIэ ащ текIоныгъэр къыдихыгъ. АР-м и ЛIышъхьэу КъумпIыл Мурат со­циальнэ хъытыухэм ащ фэ­гъэхьыгъэу къаригъэхьагъ.
Ащ къыIотагъ Колесниковхэм ялIакъокIэ тарихъ гъогоу къакIугъэм фэгъэхьыгъэу. Илъэ­си 120-рэ фэдиз хъугъэ кIэлэцIыкIухэм яегъэджэн ахэр зы­дэ­лажьэхэрэр, зэхэубытагъэу лIэ­ужхэр зыпштэхэкIэ, илъэс 324-рэ хъугъэ егъэджэн Iофыр а лIакIом зигъэцакIэрэр.
«Колесников зэшъхьэгъусэхэм еджапIэм Iоф щашIэ: Виктор Николай ыкъом ОБЖ-мкIэ ыкIи физическэ культурэмкIэ регъаджэх, Светлана Юрий ыпхъум — химиемрэ биоло­гиемрэкIэ. Ахэм япшъашъэу Аринэ нымрэ тымрэ ягъогу рыкIуагъ, Адыгэ къэралыгъо университетым естествозна­ниемкIэ ифакультет непэ щеджэ. Аринэ дышъэ медалькIэ еджапIэр къыухыгъ, сэнаущы-
гъэ зыхэлъ ныбжьыкIэхэм IэпыIэгъу ятыгъэнымкIэ Адыгэ Республикэм истипендие гъэ­нэфагъэ, муниципальнэ программэу «Гъэсэныгъэм хэ­хъоныгъэ егъэшIыгъэныр» зыфиIорэм телъытагъэуи сти­пендие къыратыщтыгъ. 2020-рэ илъэсым Урысые зэнэкъокъоу «Большая перемена» зыфиIо-
рэм текIоныгъэр къыщыдихыгъ», — къытхыгъ республикэм и ЛIышъхьэ.
Ащ къызэрэхигъэщыгъэмкIэ, Колесников зэшъхьэгъусэхэм рагъаджэхэрэм шэнышIухэр зэрахалъхьащтхэм анаIэ- тырагъэты, яшIэныгъэ алъагъэ­Iэсы, спортым хащэх.
Виктор Николай ыкъом дзэ къулыкъум дащыщтхэм ягъэ­хьазырынкIэ Джэджэ районым щызэхэщэгъэ гупчэу «Рубеж» зыфиIорэм пэщэныгъэ дызэ­рехьэ, Юнармейскэ отрядэу «Бгъашхъоми» ипащ. Колесниковхэм яунагъо исхэр юнармейцэхэм ягъусэхэу Iофтхьэбзэ зэфэшъхьафхэм ахэлажьэх, хэушъхьафыкIыгъэ дзэ операцием хэлажьэхэрэм апае зыгъэбылъхэрэ хъытыухэр аблэх, тидзэкIолIхэм дэтIыкIыгъэ чIыпIэхэм ащагъэфедэщт шэф остыгъэхэри ашIых.
«Ащ фэдэ унагъохэр щысэ зытырахыхэу щытынхэ фае. Демографие политикэм епхы-
гъэ зэхэхьэшхоу щыIагъэм зэ­нэкъокъоу «Илъэсым иунагъу» зыфиIорэм текIоныгъэр къы­щыдэзыхыгъэхэр зэкIэ Москва зэрэрагъэблэгъагъэхэми ар къеушыхьаты. Ащ щызэрэугъоигъэхэм игъоу алъэгъухэрэр къахалъхьанхэуи амал ара­тыгъагъ», — къыхигъэщыгъ КъумпIыл Мурат.
АР-м и ЛIышъхьэ ипресс-­къулыкъу
къытыгъэ къэбархэмкIэ Тхьаркъохъо Сафыет.