Ставрополь краим гандболымкIэ и Федерацие и Кубок икъыдэхын фэ­гъэхьыгъэ зэнэкъокъум ятIонэрэ илъэс хъугъэу Адыгеим икомандэ текIоныгъэр къыщыдехы.

Мыекъопэ спорт еджапIэу С.М. Джэнчатэм ыцIэ зыхьырэм зыщызыгъасэхэрэр ары респуб­ликэр къэзыгъэлъэгъуагъэхэр. Ахэр 2012-рэ илъэсым къэхъугъэх.
Турнирым команди 8 хэлэжьагъ: Самарскэ ыкIи Ростов хэкухэр, Краснодар ыкIи Ставрополь крайхэр, Адыгеир.
Тренерэу Валерий Гончар ыгъэсэрэ пшъашъэ­хэр Ростов-на-Дону ыкIи Волгоград ялIыкIохэм атекIуагъэх. Краснодар икомандэ зыдешIэхэм пчъагъэр зэфэдизэу, 15:15-у, аухыгъ. Ау къэлапчъэм Iэгуаоу дадзагъэм ыкIи къафыдадзагъэм икъэгъэлъэгъонкIэ купым апэрэ чIыпIэр щаубытыгъ. Финалныкъом ихьанымкIэ «Волгоград-1» IукIагъ, ащи 17:7-у къышIуихьыгъ.
Турнирым ифинал щызэIукIагъэх Мыекъуапэ ыкIи Тольятти якомандэхэр. ЗэIукIэгъур 17:17-у аухыгъ, ау пенальтикIэ типшъашъэхэм текIоныгъэр къыдахыгъ. Зэнэкъокъум иешIэкIо ыкIи икъэлэпчъэIут анахь дэгъоу къыхахыгъ Мыекъуапэ щыщ Самира Павленкэр.