Мобилизацием ылъэныкъокIэ зэхэщэн Iофтхьабзэхэр нахь дэгъоу резыгъэкIокIыгъэхэм афэгъэхьыгъэу къалэу Мыекъуапэ Iоф щызышIэрэ организациехэм азыфагу щыкIогъэ зэнэ­къо­къум джырэблагъэ зэфэхьысыжьхэр фашIыгъэх.

Iофтхьабзэм хэлэжьагъэх Мыекъуапэ идзэ комиссарэу Алексей Санташовыр, къэлэ администрацием ипащэ игуадзэу Юрий Томчак. Зэхэсыгъом къырагъэблэгъагъэх организациехэм ыкIи предприя­тиехэм япащэхэр, джащ фэдэу мобилизацием епхыгъэу Iоф зышIэхэрэр.
А. Санташовым къызэриIуагъэмкIэ, 2024-рэ илъэсым зэзэгъыныгъэ шIыкIэм тетэу УФ-м и УIэшыгъэ КIуачIэхэм нэ­бгырэ 600 фэдизмэ къулыкъу ащахьынэу агъэнэфагъ. Мы мафэхэм ехъулIэу 500-м ехъур къулыкъум ащагъ. Илъэсыр ыкIэм нэс нэбгырэ 90-рэ фэдиз джыри дащынэу щыт. Чъэпыогъур къызихьа­гъэм къыщыублагъэу УФ-м зыкъэухъумэжьынымкIэ и Министерствэ ихэушъхьафыкIыгъэ подразделениеу Краснодар кра­им щыIэм иIофшIэн ригъэжьагъ. Мы уахътэм мыщ къулыкъу щызыхьыщтхэм якъыхэхын лъагъэкIуатэ.
Джащ фэдэу организациехэм ыкIи предприятиехэм япащэхэм, Мыекъуапэ дзэ учетым ылъэныкъокIэ пшъэдэкIыжь зыхьыхэрэм щыгъэгъозэн Iофтхьабзэхэр щытхъу хэлъэу зэрэрагъэкIокIыгъэхэм фэшI зэрафэразэр дзэ комиссарым къы­Iуагъ. Мыекъопэ къэлэ администрацием ипащэ иунашъокIэ Iофтхьабзэу «Наша победа близка. Подпиши контракт — стань патриотом России!» зыфиIорэр рагъэкIокIызэ мэзитIум къыкIоцI зэхэща­кIохэр IофшIэкIо коллективхэм ялIыкIо­хэм аIукIагъэх, ахэр зэзэгъыныгъэхэм акIагъэтхагъэх. Джырэ уахътэм ахэр хэу­шъхьафыкIыгъэ дзэ операцием хэлажьэх.
Мыекъопэ къэлэ администрацием ипащэ игуадзэу Юрий Томчак къызэриIуагъэмкIэ, мобилизацием фэгъэхьазырыгъэнхэмкIэ пащэхэм зэхэщэн Iоф­тхьабзэхэр дэгъоу зэхащагъэх. Хэушъхьа­фыкIыгъэ дзэ операциер зырагъэжьагъэм къыщыублагъэу предприятиехэм ыкIи организациехэм Iоф ащызышIэрэ нэбгырэ 500 фэдиз зэзэгъыныгъэм кIэтхагъэх, непэ ахэм къулыкъур ахьы. Процент 83-м кIахьэу планыр гъэцэкIагъэ хъугъэ. Илъэсыр ыкIэм нэс, джащ фэдэу 2025-рэ илъэсэу къихьащтми, пшъэрылъхэм язэшIохын лъагъэкIотэщт.
Джащ фэдэу Iофтхьабзэм къызэрэщаIуагъэмкIэ, УФ-м зыкъэухъумэжьынымкIэ и Министерствэ зэзэгъыныгъэ дэзышIы зышIоигъохэм ахъщэ тынэу аратырэм хагъэхъуагъ. МыекъуапэкIэ ар сомэ миллиони 2-м ехъу.
МобилизациемкIэ зэхэщэкIо анахь дэгъухэм ацIэхэр къараIуагъэх, шIухьафтынхэр аратыгъэх. «Газпром трансгаз Краснодар» зыфиIорэм икъутамэу Мые­къуапэ щыIэм апэрэ чIыпIэр фагъэ­шъошагъ.
КIАРЭ Фатим.