ПэшIорыгъэшъэу бюджетыр
КъэкIорэ 2025-рэ илъэс бюджетым, 2026 — 2027-мкIэ агъэнэфагъэхэм зыщатегущыIэгъэхэ «публичнэ едэIунхэр» Адыгеим и Правительствэ зычIэт Унэм щызэхащагъэх.
Ащ хэлэжьагъэх АР-м и Парламент и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ и Комитет ипащэу Iэщэ Мухьамэд, Къэралыгъо Совет — Хасэм идепутатхэм ащыщхэр, муниципальнэ образованиехэм, къулыкъу зэфэшъхьафхэм, общественнэ организациехэм ялIыкIохэр, студентхэр, нэмыкIхэр.
Республикэм щыпсэухэрэм къэкIорэ илъэсымкIэ финанс тхылъ шъхьаIэр зэрэгъэпсыгъэщтыр, ащ къыщыдэлъытэгъэщтхэр ашIэнхэм фэшI мы Iофтхьабзэр илъэс къэс джырэ фэдэ уахътэм зэхащэ. Мыщ тетэу бюджетым ипроект нэIуасэ зэрэфашIыхэрэм имызакъоу, республикэм иинтернет нэкIубгъо шъхьаIи, финансхэмкIэ Министерствэм инэкIубгъуи ар къарэхьэ. ШIоигъоныгъэ зиIэ пстэури хэплъэнхэ, яшIошIхэр къыраIотыкIынхэ алъэкIыщт.
АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловым проектым нэIуасэ фишIыгъэх. ПэшIорыгъэшъэу зэрагъэнэфагъэмкIэ, 2025-рэ илъэс бюджетыр хахъохэмкIэ сомэ миллиард 32-рэ миллионрэ хъущт. Хъарджхэр мызыгъэгум нахьыбэщтых. Сомэ миллиард 34-рэ миллион 249,6-у ахэр къалъытагъэх. Сомэ миллиарди 2-рэ миллион 204,5-рэ щыкIагъэ иIэщт. ПрогнозхэмкIэ, хэбзэIахьэу сомэ миллиард 21-рэ миллиони 125,7-рэ, мыхэбзэIа-
хьэу сомэ миллион 919,5-рэ бюджетым къыхэхъощт.
бюджетым ипроцент 25,3-р гъэсэныгъэм исистемэ пэIухьащт. АхъщэкIэ къапIомэ, сомэ миллиарди 8-рэ миллион 660,6-рэ мэхъу.
Джащ фэдэу псауныгъэм икъэухъумэн сомэ миллиарди 5-рэ миллион 279,2-рэ, социальнэ лъэныкъом сомэ миллиарди 5-рэ миллиони 132,1-рэ, культурэм сомэ миллиардым ехъу апэIуагъэхьан гухэлъ яI.
ЗэкIэмкIи социальнэ лъэныкъом процент 62,5-рэ пэIуагъэхьанэу агъэнафэ.
ГъогушIыным, спортым, псэупIэ-коммунальнэ хъызмэтым, нэмыкI лъэныкъохэм апэIухьанэу финанс тхылъ шъхьаIэм щагъэнэфагъэхэми министрэр игъэкIотыгъэу къатегущыIагъ. Лъэпкъ проектхэм япхырыщыни лъагъэкIотэщт. ГущыIэм пае, 2025-рэ илъэсым ахэм къадыхэлъытагъэхэм ягъэцэкIэн пстэумкIи сомэ миллиарди 2-рэ миллион 812,9-рэ апэIухьащт.
Министрэр къызэгущыIэм ыуж зэхэсыгъом хэлэжьагъэхэм ащыщхэм упчIэхэр къатыгъэх. Сабыибэ зэрыс унагъохэм апае IэпыIэгъум, муниципальнэ образованиехэм субсидиеу афатIупщыщтым, нэмыкIхэм ахэр афэгъэхьыгъагъэх. ЗэкIэми джэуап зэхэугуфыкIыгъэ къаратыжьыгъ.
ХЪУТ Нэфсэт.