Адыгэ Республикэм и Комиссиеу къолъхьэ тын-Iыхыным пэшIуе­кIогъэным епхыгъэ Iоф­шIэным фэгъэзагъэм изэхэсыгъо республикэм и Правительствэ и Унэ щыкIуагъ.

Ар зэрищагъ Адыгеим и ЛIышъхьэу КъумпIыл Мурат. Ащ иIофшIэн хэлэжьагъэх АР-м и Къэралыгъо Совет — Хасэм и Тхьаматэу Влади­мир Нарожнэр, федеральнэ инспектор шъхьаIэу Сергей Дрокиныр, АР-м ипроку­ратурэ, щынэгъончъэнымкIэ фе­деральнэ къулыкъум ­
и Гъэ­IорышIапIэу Адыгэ Рес­публикэм щыIэм, хэгъэгу кIоцI IофхэмкIэ Министерствэм, уплъэкIокIо къулы­къухэм, муниципалитетхэм япащэхэр. Хэбзэ къулыкъухэм къолъхьэ тын-Iыхыным пэшIуекIорэ IофшIэнэу агъэцакIэрэм иIофыгъохэм зэхэсыгъом хэлажьэхэрэр атегущыIагъэх, лъэпкъ проектхэм япхырыщын зыщыкIорэ лъэ­хъаным ащ фэдэ мыхъо-­мышIагъэхэм апэуцужьыгъэнымкIэ Iофэу ашIэрэм икIэ­уххэр зэфахьысыжьыгъэх.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым лъэпкъ проектхэу «Щынэгъончъэ ыкIи шэпхъэшIухэм адиштэрэ гъо­гухэр», «ПсэупIэмрэ къэлэ щыIакIэмрэ», «Тыкъэзыуцу­хьэрэ дунаир» зыфиIохэрэмкIэ Iофтхьабзэхэр зэшIохыгъэ зэрэхъугъэхэм къатегущыIагъ. Мыщ дэжьым къыхэгъэщы­гъэн фае ахэм ателъытагъэу псэолъэшI IофшIэнхэр бэу зэрагъэцакIэхэрэр. Подряднэ организациехэр къыхахыхэ зыхъукIэ зэзэгъыныгъэ шIыкIэм тегъэпсыхьэгъэ федеральнэ хэбзэгъэуцугъэу щы­Iэм къыпкъырэкIых. Ащ нэмыкIэу непэрэ мафэмкIэ псэуалъэхэм язытет, Iофы­гъоу къапыщылъхэр ыкIи пIа­лъэу агъэнэфагъэхэр пхы­рыщыгъэ зэрэхъущтхэр Министерствэм дэжь щызэхэщэгъэ Общественнэ советым къыхалъхьэх. Мылъкур зэрагъэфедагъэм ыкIи IофшIэнхэр ыкIэм зэрэфэкIуагъэхэм

афэгъэхьыгъэ отчетхэр шIыкIэ гъэнэфагъэм тетэу къэралыгъо къэбар системэу «Электрон бюджетыр» зыфиIорэр къыз­фагъэфедэзэ аIэкIагъахьэх. Лъэпкъ проектхэу рахъухьагъэхэм атегъэпсыхьагъэу 2024-рэ илъэсым агъэпсынэу щытыгъэ проектхэр зэкIэ агъэцэкIагъэх.
КъызэрэхагъэщыгъэмкIэ, лъэпкъ проектхэм къыдалъытэхэрэр зыщызэшIуа­хыхэрэ лъэхъаным къолъхьэ тын-Iыхыныр къахэмыфэным епхыгъэ Iофтхьабзэхэр ренэу зэрахьэх. 2023 — 2024-рэ илъэс­хэм уплъэкIокIо ыкIи хэбзэухъумэкIо къулыкъухэм къолъхьэ тын-Iыхыным епхыгъэ хэбзэгъэуцугъэу щыIэр аукъуа­гъэу къызэрэхэмыкIыгъэр къаушыхьатыжьыгъ. Шэпхъэ-правовой актхэу Ми­нистерствэм къыIэкIэкIхэрэр зэкIэ АР-м и Прокуратурэ, АР-м и ЛIышъхьэ и Ад­министрацие и Правовой гъэIорышIапIэ, Урысыем юстициемкIэ и Министерствэ и ГъэIорышIапIэу Адыгеим щыIэм ащауплъэкIух.
АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат лъэпкъ проектхэм ягъэцэкIэнкIэ къолъхьэ тын-Iыхыным инэшанэхэр къахэмыфэнхэм пае шIыкIэ-­амалэу зэрахьэхэрэм къатегущыIагъ. Ащ къызэрэхигъэщыгъэмкIэ, щэфын Iофтхьабзэхэр зэрахьэхэ зыхъукIэ, шэпхъэ гъэнэфагъэу щыIэхэм къапкъырэкIых. Комитетым къепхыгъэ организацие пстэуми ащ фэдэу яIофшIэн зэхащэ. Къолъхьэ тын-Iыхыныр дэгъэзыжьыгъэнымкIэ Iофтхьабзэхэр зэрэзэрахьэхэрэм дакIоу муниципалитетхэм уасэу щыIэр ащамыукъоным иIофыгъо­хэми анаIэ атырагъэты.
Адыгеим и ЛIышъхьэ спорт лъэпкъ зэфэшъхьафхэмкIэ гъэхъагъэу ашIыгъэ­хэм къакIэупчIагъ, цIыфхэр жъугъэу зы­хэлэжьэхэрэ спортым зегъэушъомбгъугъэнымкIэ амалхэу арагъэгъотхэрэм джыри нахь ахагъэхъонэу пшъэрылъ афишIыгъ. ПсэолъэшIыным ылъэныкъокIи проектхэр щыIэныгъэм щыгъэцэкIагъэ хъунхэмкIэ пшъэрылъ гъэнэфагъэхэр афишIыгъэх. Бюджет къэкIуапIэхэр нахь шIогъэ ин къатэу гъэфедэгъэнхэм мэхьанэшхо зэриIэм, лъэпкъ проектхэм къыдалъытэхэрэр игъом гъэцэкIэгъэнхэ зэрэфаем Адыгеим и ЛIышъхьэ анахьэу анаIэ тыраригъэдзагъ.
«Мы аужырэ лъэхъаным республикэм бэ щызэшIохыгъэ хъугъэр. Лъэпкъ проектхэмрэ федеральнэ программэхэмрэ къыдалъытэхэрэм ягъэцэкIэнкIэ анахь шъолъыр пэрытхэм Адыгеир ахэт. Ау ащ дакIоу бюджет къэкIуапIэхэр зы­фытегъэпсыхьэгъэ лъэныкъохэм икъоу апэIугъэхьэгъэнхэм, цIыфхэм ящыIакIэ нахьышIу шIыгъэным, транспортымкIэ зекIонхэм, Iоф ашIэным, яфэIо-фашIэхэр нахь дэгъоу зэшIохыгъэ хъунхэм икъоу зэкIэми тынаIэ атедгъэтын фае. Ащ пае хэбзэгъэуцугъэу щыIэм диштэу зекIо­гъэн, подрядчикхэм нахь шIогъэ ин хэлъэу адэлэжьэнхэ, зэзэгъыныгъэу зэдашIы­хэрэмкIэ IофшIэнхэр гъэцэкIагъэ зэрэ­хъухэрэр ауплъэкIун, проект-сметэ документацием изытет икъоу гъэунэфыгъэн фае. Грантхэмрэ субсидиехэмрэ къыхагъэкIыхэ зыхъукIэ Iофыгъоу зэшIохыгъэн фаехэм икъоу ащыгъозэнхэ ыкIи къыдалъытэнхэ фае», — къыIуагъ КъумпIыл Мурат.
Зэхэсыгъом икIэухым чIыпIэ зыгъэIорышIэжьыным икъулыкъухэм къолъхьэ тын-Iыхыным пэшIуекIогъэнымкIэ яIоф­хэм язытет тегущыIагъэх. МыщкIэ къэгущыIагъэх Красногвардейскэ, Мые-­
къопэ ыкIи Тэхъутэмыкъое районхэм япащэхэу Гъубжьэкъо Темур, Михаил Марьиныр ыкIи Шъао Аскэр. КъызэрэхагъэщыгъэмкIэ, ахэм прокуратурэм гъусэныгъэ дыряIэу хэукъоныгъэхэр игъом къыхэгъэщыгъэнхэм анаIэ тырагъэты, ащ дакIоу унашъоу аштэхэрэм лъэпсэ тэрэз яIэн зэрэфаем къыпкъырэкIых. Муниципальнэ къулыкъушIэхэм яхахъохэмрэ ямылъкурэ афэгъэхьыгъэ къэбарэу къырахьылIэрэм ишъыпкъапIэ тэрэзэу ауплъэкIуным, къолъхьэ тын-­Iыхыным пэшIуекIорэ хэбзэгъэуцугъэм къыдилъытэрэ шапхъэхэр амыукъонхэм анаIэ тыраригъэдзагъ.
АР-м и ЛIышъхьэ ипресс-­къулыкъу
къытыгъэ къэбархэмкIэ
Тхьаркъохъо Сафыет.