ИлъэсыкIэ еджэгъур зырагъэжьэжьыгъэр мазэм ехъугъ, республи­кэм ит гурыт еджапIэхэм яIофшIэн чанэу падзэжьыгъ. Мы аужырэ илъэсхэм гъэсэныгъэм исистемэ зэхъокIыныгъэхэр фэхъух, лъэныкъуакIэхэмкIэ Iоф ашIэу, гъэсэныгъэ тедзэм нахь зырагъэушъомбгъоу аублагъ. Мыекъуапэ дэт гурыт еджапIэу N 7-м бэмышIэу «Адыгэ макъэр» щыIагъ, ащ ипащэу Виталий Оберниновымрэ ащ пIуныгъэ IофхэмкIэ иупчIэжьэгъоу КIыкI Артуррэ гущыIэгъу афэхъугъ.

ЕджапIэм щызэхащэгъэ къэ­гъэнэжьэкIо отрядым «Тхач01» зыфиIорэм мы илъэсыкIэ еджэгъум иIофшIэн ыублагъ, КIыкI Артур ащ кIэщакIо фэхъугъ. Отрядым пшъэрылъэу иIэр ныбжьыкIэхэр яхэгъэгу фэшъып­къэхэу пIугъэнхэр, цIыфыгъэ шэпхъэ дахэхэм арыгъозэнхэр, шIэныгъэу зэрагъэгъотыхэрэм ахагъэхъоныр ары.
Iофтхьабзэхэу зэхащэхэрэм, зэнэкъокъухэм еджакIохэр ахэ­лажьэх, а пстэуми якъулайныгъи яшIэныгъи нахь ахагъахъо. От­рядым хэтхэм зэгурыIоныгъэ ахэлъынымкIи яшIуагъэ къэкIо.
— ЕджапIэм щызэхащэгъэ отрядым мэхьанэшхо иI. КIэлэеджакIохэр чIыпIэ зэжъу зифэхэрэм теубытагъэ ахэлъэу зекIонхэм, ежьхэм ямызакъоу зыхэт цIыфхэми ящынэгъончъа­гъэ къаухъумэным афагъасэх, — къыIуагъ Виталий Оберниновым.
— Тхьамафэ къэс зигъо Iофыгъохэм афэгъэхьыгъэу кIэлэеджакIохэм зэдэгущыIэгъухэр адэтэшIых, анахьэу тынаIэ зы­тетыр къыткIэхъухьэрэ лIэужхэм яхэгъэгу шIу алъэгъоу пIугъэнхэр ары. Ащ нэмыкIэу мэхьанэ зиIэ мэфэкIхэр блэтымыгъэкIэу, ахэм афэгъэхьыгъэ егъэджэнхэр афызэхэтэщэх. БэмышIэу Рос­тов хэкум икъалэу Таганрог щызэхащэгъэ зэнэкъокъум ты­хэлэжьагъ, я 2-рэ чIыпIэр къэтхьыгъ. Джы Адыгэ Республикэм щызэхащэщт мыщ фэдэ Iоф­тхьабзэм зыфэтэгъэхьазыры, — къыIуагъ КIыкI Артур.

Отрядым пшъэрылъ гъэнэфагъэхэр зыфегъэуцужьых. ОшIэ-дэмышIагъэ зыхэлъ тхьамыкIагъо къызыхъурэм зэрэзе­кIощтхэм фэгъэсэгъэнхэм ыкIи цIыфхэм якъэухъумэн епхыгъэ Iофтхьабзэу зэрахьан фае хъущт­хэм еджакIохэр нэIуасэ афешIых.
— Медицинэ-санитар лъэныкъомкIи нахь игъэкIотыгъэу кIэлэеджакIохэм Iоф адэтшIэщт. Апэрэ IэпыIэгъу закъор арэу щымытэу, уIагъэм, зэпыкIыгъэм ежь-ежьырэу зэреIэзэщтхэм, лъыр къызэрагъэуцущтым япхыгъэу кIэлэеджакIохэм къафэтэIуатэ, ятэгъэлъэгъу. Интерактивнэ доскэр дгъэфедэзэ къэтIуатэрэр нэрылъэгъу афэтэшIы. Мыщ фэдэ сыхьатхэм шIогъэ ин къатэу сэлъытэ, ащ дакIоу кIалэхэр дзэ къулыкъум фэтэгъэхьазырых. Дзэм имэхьанэ нахь къызэраIэтыжьырэм непэ мэхьанэшхо иI, — къыIуагъ КIыкI Артур.
Лъэпшъыкъо
Фатим.

Сурэтхэр: еджапIэм ихъарзынэщ.