АIэкIэ ашIыгъэх
Тым и Мафэ къыдыхэлъытагъэу хэушъхьафыкIыгъэ дзэ операцием хэлажьэхэрэм, иветеранхэм ыкIи хэкIодагъэхэм якIэлэцIыкIухэм апае тхьацухэкI гъомылэпхъэ IэшIухэм яшIынкIэ мастер-классэу «Дышъэ Iапэхэр» зэхащагъ. Ащ кIэщакIо фэхъугъ къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ.
Iофтхьабзэр пэублэ гущыIэкIэ къызэIуихыгъ фондым ипащэ игуадзэу Джарымэ Еленэ. Ащ къызэрэхигъэщыгъэмкIэ, мастер-классэу зэхащагъэр зы лъэныкъомкIэ сэнэхьат гъэнэфагъэм епхыгъ, адрэмкIэ — дзэ операцием иветеранхэм якIэлэцIыкIухэр янэхэм къыращэлIэщтхэшъ, унагъор нахь зэпэблагъэ хъущт, хэлажьэхэрэр нэIуасэ зэфишIыщтых.
— Мы мэфэкIыр тикъэралыгъо джыри щызэлъашIэу щытэп, ау имэхьанэ зэрэиныр къыткIэхъухьэрэ ныбжьыкIэхэм ядгъэшIэн фае. Тым чIыпIэу унагъом щиубытырэр, исхэмкIэ щысэтехыпIэу зэрэщытыр зэкIэми тэшIэ. Ар етIани ветеранэу е дзэкъулыкъушIэу щыт зыхъукIэ, имэхьани нахь зыкъеIэты, — хигъэунэфыкIыгъ Джарымэ Еленэ.
Джащ фэдэу тигущыIэгъу къызэрэхигъэщыгъэмкIэ, фондымрэ Мыекъопэ къэралыгъо технологическэ университетымрэ чанэу зэдэлажьэх, а чIыпIэр ары Iофтхьабзэри зыщызэхащагъэр, шапхъэхэм адиштэрэ Iэмэ-псымэхэу, хьакъу-шыкъухэу агъэфедэщтхэр апшъэрэ еджапIэр ары языгъэгъотыгъэхэр.
Ныбжь зэфэшъхьаф зиIэ кIэлэцIыкIу 15 фэдиз къырагъэблэгъагъ. Мастер-классыр къафэзытыгъэр социальнэ координаторэу Ожъ Динара. Ар тхьацухэкI IэшIу-IушIухэм ягъэхьазырынкIэ IэпэIас. Динарэ игуапэу кIэлэцIыкIухэм пирожнэхэр аригъэшIыгъэх, адрэхэми агу рихьэу къаригъэлъэгъурэр кIашIыкIыжьыгъ. АIэшъхьитIукIэ ашIыгъэ IэшIухэр ашхыгъэх.
Iофтхьабзэм къекIолIагъэхэм ащыщхэм гущыIэгъу тафэхъугъ, ахэм ятэ къызэрашIошIырэр, пщэрыхьаныр агу рихьыгъэмэ къядгъэIотагъ.
Мадина Джамалутдиновам илъэс 13 ыныбжь, ятэ хэушъхьафыкIыгъэ дзэ операцием хэлажьэ:
— Сятэ фэдэ щымыIэу сэлъытэ, къытфэшIу дэд, сыгукIэ къыспэблагъ. Сыд сыфаеу есIуагъэми, зэкIэри къысфешIэ. Тыкъеухъумэ, ар джы къытщэкIэ.
Фатимэ илъэси 5 ныIэп ыныбжьыр, ау ащ ятэ шIулъэгъуныгъэу фыриIэр гущыIэ заулэкIэ къыриIотыкIын ылъэкIыгъ:
— Сятэ зэкIэмэ анахь шIу сэлъэгъу, зэкIэмэ ар анахь дэгъу, сыдигъуи ар къытфэгумэкIы.
IэшIу-IушIухэм яшIынкIэ зиIэпэIэсэныгъэ зыушэтыгъэхэм Фаинэ Зайцевар ахэтыгъ. Ащ къызэриIуагъэмкIэ, загъорэ унэм щыпщэрыхьаныр икIас ыкIи непэрэ Iофтхьабзэр лъэшэу ыгу рихьыгъ.
Iэшъынэ Сусан.
Сурэтхэр: Iэшъынэ Аслъан.