Сабыитф иI, ахэм ящысэтехыпIэным ренэу пылъ. Хъот Бислъан Теуцожь районым ит къутырэу Колосым щэпсэу, игущыIэ пытэ илъфыгъэхэр рэгъуазэх. Тыр Хъотхэм яунагъо щалъытэу хабзэ. МэфэкIым ипэгъокIэу ахэм гущыIэгъу тафэхъугъ.

Мы мэфэкIыр тикъэралыгъо зыщыхагъэунэфыкIырэр бэшIагъэп, ащ епхыгъэ унашъом Урысыем и Президент зыкIэтхагъэр 2021-рэ илъэсыр ары. А мафэр чъэпыогъум иящэнэрэ тхьаумафэу агъэнэфагъ ыкIи 2024-рэ илъэсым ар чъэпыогъум и 20-м тефэ. Сабыим ипIункIэ, унагъомкIэ тым имэхьанэ зыкъегъэIэтыгъэным ар фытегъэпсыхьагъ.
Хъулъфыгъэм ищыIэныгъэкIэ ты дэгъу ар хъуныр анахь шъхьаI ыкIи пшъэ­дэ­кIыжьышхоу щыт. СыдигъокIи тыр икIа­лэхэмкIэ щысэтехыпIэным, ипшъа­шъэ­хэм­кIэ цIыфышIуным нахь пылъ. Джащ фэд непэ зигугъу къэтшIыщт Хъот Бислъан.
Ежьыррэ ишъхьэгъусэу Рузанэрэ кIэ­литф зэдапIу. Ахэм анаIэ нахь зытырагъэтырэр нахьыжъхэм шъхьэкIэфэныгъэ­рэ лъытэныгъэрэ афашIэу, щысэтехыпIэхэу, цIыфышIухэу агъэсэнхэр ары. АщкIэ ны-тыхэм яIэпыIэгъушIух нэнэ-татэу къадэпсэухэрэр.
Хъотхэм якIалэхэр зэгурыIожьхэу, зэдеIэжьхэу, анаIэ зэтетыжьэу щытых, лъэхъанми, адыгэ хабзэми атетхэу зэрапIущтхэм нахьыжъхэр пылъых. Ахэм ятворческэ хэхъоныгъэ, яеджэн, уна­гъом имэхьанэ зэхарагъэшIыкIыным ны-тыхэр лъэплъэх. Джащ фэдэу мы унагъом тым, хъулъфыгъэм имэхьанэ уасэ зэрэщыфашIырэр Рузанэ къыхегъэщы.
— Ным унагъомкIэ ыпшъэ ифэрэ IофшIэныр нахьыбэми, тыр ащ ыуж къинэрэп. Тэ етIани ти­лъфыгъэхэр зэрэ­шъэожъыехэр къызыдэплъытэкIэ, ахэр зыкIырыплъыхэрэр тыр ары, ар ящысэтехыпI, илъагъо рэкIох, игущыIэ пытэ рэгъуазэх. Тыр къогъукъотышху, — къеIуатэ Рузанэ.
Ежь Бислъани лъэшэу икIалэхэм ынаIэ атет, сыд фэдэрэ егъэжьапIи, ищыкIагъэмэ, адырегъаштэ, афэгумэкIы, Iоф­шIэным фепIух.
— АпэрапшIэу цIыфыгъэ ахэлъэу пIугъэнхэм тынаIэ тетэгъэты. Сэ сшъхьэ­кIэ былымхэр бэу сIыгъых, хатэри тэлэжьы. Ащ фэдэ IофшIэнхэм кIалэхэр ащымыщынэнхэм фэсэгъасэх, ежьхэри зэрафэлъэкIэу къыддеIэх. Джащ фэд, зыгъэпсэфыгъо ыкIи мэфэкI мафэхэр тщыгъупшэхэрэп. Тызэгъусэу пцэжъыяшэ тэкIо, амалэу щыIэм елъытыгъэу, сабыйхэм уахътэ къафыхэсэгъэкIы, — къыIуагъ Бислъан.
Тым и Мафэ фэгъэхьыгъэу спорт зэнэкъокъоу Теуцожь районым щыкIощтым Хъотхэм яунэгъо зэгурыIожь ятэ апэ итэу хэлэжьэщтых. Псауныгъэм зэрар езыхырэ шIыкIэхэр щагъэзыех, спортым мыхэр лъэшэу пылъых.
Анахьыжъэу Тамирлан Адыгэ къэралыгъо университетым иколледж физическэ культурэмкIэ ифакультет ия 2-рэ курс щеджэ. Ислъам Нэчэрэзые гурыт еджапIэм ия 6-рэ, СултIан – ия 4-рэ класс исых. Щыри самбистых.

— Тамирлан ицIыкIугъом къыщегъэ­жьагъэу ыгу рихьэу самбэм пылъ. Джы ащ олимпийскэ резервымкIэ республикэ спорт еджапIэм зыщегъасэ ыкIи шъолъы­рым имызакъоу, къэралыгъом щызэхащэрэ зэнэкъокъухэм хагъэунэфыкIырэ чIыпIэхэр бэрэ къащихьыгъ. Ащ къыкIэ­лъыкIохэрэ Ислъами, СултIани самбэм макIох, район зэнэкъокъухэм ахэлажьэх. Салим джыри кIэлэцIыкIу IыгъыпIэм чIэс, Алкъэс цIыкIум мэзих ыныбжь, — къыIуагъ Рузанэ.
Тамирланрэ ятэрэ ныбджэгъуныгъэ зэфыщытыкIэхэр зэдыряIэх.
— Сятэ ишэнкIэ Iасэу щыт, егъашIи къыттекуорэп. Ау ащ пае тыщыщынэщтми, къыIорэр шIокI имыIэу дгъэцэкIэщтми къанэрэп. Лъэшэу ынаIэ къыттет, зыщищыкIагъэм тыкъеухъумэ, къытфэгумэкIы. Iофэу ыгъэцакIэрэр зэрэфэдгъэпсынкIэщтым, зэрэдэдгощыщтым тэри зэшхэмкIэ тыпылъ. Спорт зэнэкъокъу­хэм бэрэ сахэлажьэ, уахътэу иIэм елъытыгъэу, ахэм тятэ къыздэкIо, нахь тэрэзэу сызэрэзекIощтыр къысеIо. ТэркIэ тятэ — зэкI, ар тищысэтехыпI, — къыIуагъ Тамирлан.
Унагъо пэпчъ хэбзэ гъэнэфагъэхэр иIэх. Нахьыжъхэр зыщалъытэрэ Хъотхэм яунагъо зыныбжь хэкIотагъэхэм я Мафэ зыми пашIырэп. БгъуитIумкIи ныжъ-ты­жъэу яIэхэр агъашIох. КIэлэцIыкIухэр къызщыхъугъэ мафэхэр ежьхэм зэрашIоигъоу хагъэунэфыкIы.
Къэблэгъэрэ тым и Мафэ унагъом ышъхьэ — тэтэжъэу Заурбэч ыкIи Бислъан агъэшIощтых. КIэлэ нахьыкIэхэм аIэ цIыкIухэмкIэ ашIыгъэ сурэтхэр къафахьыщтых, шхыныгъо IэшIухэр афаупщэрыхьыщтых.
Мыщ фэдэ мэфэкIхэм унэгъо хэбзэ-зэхэтыкIыхэр, ащ илъ зэфыщытыкIэр агъэпытэ. ТапэкIэ ар нахьыбэмэ хагъэ­унэфыкI хъунэу тэгугъэ.
Iэшъынэ Сусан.
Сурэтыр: Хъотхэм яхъарзынэщ.