АР-м итеатральнэ зэхахьэ и Лъэпкъ ыкIи и Урыс те­атрэхэм яIофшIэгъу лъэхъаныкIэ зэраублагъэм фэгъэхьыгъэу АР-м итеатральнэ зэхахьэ ихудожественнэ пащэу, Адыгеим культурэмкIэ изаслуженнэ IофышIэшхоу Ацумыжъ Рустам, УФ-м инароднэ артистэу, режиссерэу Кукэнэ Мурат ыкIи АР-м изаслуженнэ артистэу, режиссерэу Роман Корчага журналистхэм зэдэгущыIэгъу адыряIагъ.

— Театрэм ипэIухъо творческэ Iоф­шIэгъэшхохэмкIэ къызэIутэхы. Апэрэ пшъэрылъэу тиIэр титарихъ, тикультурэ бай, Адыгеим цIыфэу щыпсэухэрэм язэкъотныгъэ, языкIыныгъэ театрэр ятамыгъэу щытыныр ары. Къэгъэлъэ­гъон гъэшIэгъонхэмкIэ цIыфхэр театрэм къет­щэлIэнхэм тыпылъ. Камернэ музыкальнэ театрэм ыгъэуцугъэ комедиеу «Вы­пьем за любовь!» зыфиIорэмкIэ къэгъэ­лъэгъонхэр тэублэ. Лъэпкъ драмтеатрэу И. Цэим ыцIэ зыхьырэм «АIуагъ къа­Iожьыгъ» зыфиIорэ пьесэу адыгэ драматургэу Мамый Ерэджыбэ ытхыгъэм техыгъэр къыгъэлъэгъощт.
Илъэсым ыкIэм нэс урысыбзэкIи адыгабзэкIи спектаклитIу тэгъэхьазыры, ахэм ашъхьэ къитхыгощтэп. Шэн зэрэтфэхъугъэу, мэфэку ыкIи бэрэскэшхо пчыхьэ къэс къэгъэлъэгъонхэр зэхэтщэщтых. Ахэр зэ нэмыIэми къыкIэтIотыкIыжьыгъэщтхэп. Театрэхэр зэрыпсэущтхэр къалэжьын фае. Къытэплъырэ цIыфхэр нахьыбэ зэрэтшIыщтым тыпылъ, — къыIуагъ Ацумыжъ Рустам.

«АIуагъ-къаIожьыгъ» зыфиIорэ пьесэм режиссерхэу Кукэнэ Муратрэ Ацумыжъ Рустамрэ дэлэжьагъэх. Жъымрэ кIэмрэ зыщызэолIэхэрэ IофшIагъэр шэпхъэшIу­хэм адиштэу агъэхьазырыгъ.
— Лъэпкъ театрэм ыгъэуцугъэ спектакль дэгъухэр зэкIэ тыугъоижьыгъэх, ахэм Iоф адэтэшIэ. Адыгэхэм зекIо­кIэ-шIыкIэ дэеу къытхафэхэрэр сэмэркъэу шъуашэм илъэу къитэгъэлъэгъукIых. Ахэм тызэрагъэплъыжьы, тырагъэгу­пшысэ. Тарихъым, культурэм, сэнау­щыгъэм, артистхэм кIуачIэу, зэхашIэу, гуетыныгъэу ахэлъым яшIуагъэкIэ спектаклэхэр къыддэхъугъэхэу сэлъытэ. Тидышъэ кIэн къэтыухъумэныр ары пшъэ­рылъ шъхьаIэу тиIэр ыкIи непэрэ мафэм ар зэрифэшъуашэу тэгъэцакIэ, — хигъэунэфыкIыгъ Ацумыжъ Рустам.

— Мамый Ерэджыбэ ипьесэу «Гъа­шIэм имэзищ» зыфиIорэм тыхэIэзыхьажьи, «АIуагъ-къаIожьыгъ» зыфиIорэм игъэуцун тыдэлэжьагъ. Гупшысэ ин зыхэлъ тхыгъэм адыгэм игукъауи, игу­шIуагъуи, ишэн-хабзи къырегъэлъэгъукIы. СэмэркъэукIэ Iофыгъуабэ къэтэIэты. Актер пэпчъ игъэпсыкIи, игупшысакIи, игущыIи, щыгъыщтыми гъэпсыкIэ гъэ­нэфагъэ яI. ЩыIэныгъэм илъэныкъо пстэумкIи лIэужхэм гъэхъагъэу ашIы­хэ­рэм, упчIэу зэхэфыгъэн фаехэм яIо­фыгъохэр сценэм къыщыIэтыгъэнхэм, ныбжьыкIэхэм ашIогъэшIэгъоныщт къэгъэлъэгъонхэр зэхэщэгъэнхэм мэхьанэшхо иI. Театрэм иамалхэр гъунэнчъэх, ахэр зэрэтлъэкIэу тэгъэфедэх, — къы­Iуагъ Кукэнэ Мурат.
Камернэ музыкальнэ театрэм комедиеу «Выпьем за любовь!» зыфиIорэр ыгъэуцугъ.
— ЩыIэныгъэм къыхэхыгъэ пьесэр гъэшIэгъонэу гъэпсыгъэ. Сэмэркъэу дахэ ащ пхырыщыгъ. Зэрэщытэу ыкупкI къэс­Iотэщтэп, ау бзылъфыгъэмрэ хъулъфыгъэмрэ язэфыщытыкIэ гъэшIэгъонхэр ащ къызэрэхафэхэрэр хэзгъэунэфыкIы сшIоигъу, — къыIуагъ Роман Корчага.
Театрэм щыIэныгъэм ихъугъэ-шIагъэ­хэм ягупчэ итэу цIыфхэр зэфещэх.