Адыгэ Республикэм гъэсэныгъэмкIэ иIофышIэхэу, егъэджэн Iофым
иветеранхэу лъытэныгъэ зыфэтшIыхэрэр!

КIэлэегъаджэм и МафэкIэ тышъуфэгушIо!
ЛIэуж пстэуми лъэшэу агъэлъапIэхэрэм мы мэфэкIыр ащыщ. ШIэныгъэм идунай тызэхэзыщэгъэ, цIыфыгъэ, пшъэдэкIыжь тхэлъыным, Хэгъэгур шIу тлъэгъуным, Iофым тIэ екIуным тыфэзыгъэсэгъэ кIэлэегъаджэхэр сыдигъуи шIукIэ тыгу къэкIыжьых. Гуетыныгъэ фыряIэу зиIофшIэн зыгъэцэкIэрэ, ныбжьыкIэхэр щыIэныгъэм фэзыпIухэрэ, шIэныгъэ икъу аIэкIэзыгъэхьэрэ кIэлэегъаджэхэм тызэрафэразэр мыщ фэдэ мафэм къэтэIо.
КIэлэегъаджэм иIофшIэн шIуагъэ къытэу зэхищэнымкIэ мэхьанэ зиIэр IэпэIэсэныгъэу хэлъымрэ шIэныгъэу иIэмрэ язакъоп. Ащ игулъытэ, ицIыфыгъэ, кIэлэцIыкIухэр зылъищэнхэ, ахэм яамалхэм зыкъызэ­­Iуаригъэхын зэрилъэкIырэми бэ ялъытыгъэр.
Егъэджэн Iофым мылъкоу пэIухьэрэм ибагъэ, техникэу агъэфедэрэм шъуиIофшIэнкIэ мэхьанэшхо яI. Тишъолъыр иучреждениехэу гъэсэныгъэ языгъэ­гъотыхэрэр джырэ шапхъэхэм адиштэнхэмкIэ ищыкIэгъэ амалхэр непэ Адыгэ Республикэм щызэрахьэх: еджапIэхэр тэгъэпсых, тэгъэцэкIэжьых, гъэсэныгъэм­кIэ инфраструктурэм лъэшэу тынаIэ тетэгъэты, ныбжьыкIэ зэчыишIухэм IэпыIэгъу тафэхъу.
Адыгеим икIэлэегъаджэхэм опытышхо зэряIэм, IэпэIэсэныгъэ ин зэрахэлъым, яIоф зэрэфэшъыпкъэ­хэм, республикэм гъэсэныгъэмкIэ иинфраструктурэ изытет нахьышIу зышIырэ зэхъокIыныгъэшIухэм яшIуагъэкIэ гъэсэныгъэм нахь зыкъызэриIэтыщтым, ныбжьыкIэхэм ятворческэ амалхэм нахь зыкъызэрэзэIуахыщтым тицыхьэ телъ.
КIэлэегъаджэхэу, егъэджэн Iофым иветеранхэу лъытэныгъэ зыфэтшIыхэрэр! Хьалэлэу шъузэрэлажьэрэм, ныбжьыкIэхэм шъунаIэ зэратежъугъэтырэм, республикэми, хэгъэгуми янеущырэ мафэ нахь дахэ хъуным шъуиIахьышIу зэрэхэшъушIыхьэрэм афэшI лъэшэу тызэрэшъуфэразэр къэтэIо.
Псауныгъэ пытэ шъуиIэнэу, шъунасыпышIонэу, шъуиIофшIэн гъэхъагъэхэр щышъушIынэу, шIоу щыIэр зэкIэ къыжъудэхъунэу тышъуфэлъаIо!

Адыгэ Республикэм и ЛIышъхьэу, Урысые политическэ партиеу «Единэ Россием»
и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет - Хасэм и Тхьаматэу
Владимир Нарожнэр