ПхъэкIэ е нэмыкI гъэстыныпхъэ пытэкIэ зиунэ зыгъэплъыхэрэм ашIэн фаехэр

ПхъэкIэ е нэмыкI гъэстыныпхъэ пытэкIэ зиунэ зыгъэплъыхэрэм зыщагъэгъупшэ хъущтэп хьакухэм фабэр къызэратырэм нэмыкIэу, машIом зыкъыштэнымкIи щынагъо къыздахьын зэралъэкIыщтыр.

Бжыхьэ-кIымэфэ лъэхъаным унэе унэхэм арыт хьакухэм бэрэ къакIанэу къыхэкIы. ТхьамыкIагъом лъапсэ фэхъухэрэр зэфэшъхьафых. Ахэм зыкIэ ащыщ унэхэр зэрагъэплъырэ хьакухэр ашIыхэ зыхъукIэ, машIом зыкъымыштэнымкIэ шапхъэхэр зэраукъорэр.

Хьакухэмрэ IугъоикIыпIэхэмрэ язытет ренэу ауплъэкIун фае. Онджэкъхэр зыгъачэхэрэм зэу ащыщ IугъоищыпIэхэм арыхъорэ пкIэгъуасэр зэрэстырэр. Хьакухэм ягъэпсынкIэ шапхъэхэр къыдалъытэн, Iугъор зэрыкIырэ дэпкъхэмрэ онджэкъхэмрэ игъом гъэкъэбзэгъэнхэ фае. Хьаку Iупэм иджэхашъо сантиметрэ 50х70 зиинэгъэ тенэч бзыгъэ теIулIэгъэнэу щыт. ЯтIонэрэ хэукъоныгъэу ашIыхэрэм ащыщ бензин, фэтагын е къэорэ гъэ­стыныпхъэхэр хьакум зэрэпа­кIэхэрэр. Джащ фэдэу пхъэу ащ палъхьэхэрэм якIыхьагъи хьакум фытегъэпсыхьэгъэн фае. Хьакушъхьэр бгъэплъыщэнэу щытэп. МашIо зэрамышIыхьэу бэрэ щытыгъэ хьакур игъорыгъозэ бгъэплъын фае.

Ежь-ежьырэу зиунэ пхъэкIэ е нэмыкI гъэстыныпхъэ пытэкIэ зыгъэплъыхэрэм ягугъу тшIы зыхъукIэ, къыхэтымыгъэщын тлъэкIырэп щынэгъо ин къэзытыхэрэм мэшIожь гъозыр зэращыщыр. МашIом ыпкъ къикIэу зидунай зыхъожьыхэрэм азыныкъо нахьыбэр ары зытхьа­лэрэр. Ащ шъо иIэп, цIыфым къышIэрэп. IугъоищыпIэр зэфэзышIырэ гъучIыр зырагъачъэкIэ, мэшIожь гъозыр иты мэхъу.

ПхъэкIэ зиунэ зыгъэплъы­хэрэм ашIэ мыхъущтхэр:

— машIо зэрышIыхьэгъэ хьакум лъыплъэн щымыIэу е зыныбжь имыкъугъэхэр Iусхэу къэбгъэнэныр;

— хьаку Iупэм машIор къы­зыкIэнэщт пкъыгъохэр Iуп­лъ­хьанхэр;

— щыгъынхэмрэ пхъэхэмрэ хьакушъхьэм щыбгъэчъэпхъынхэр;

— машIом изэкIэгъэблэнкIэ къэорэ гъэстыныпхъэхэр бгъэфедэнхэр;

— хьакупчъэр Iухыгъэу ащ машIо ипшIыхьаныр;

— шIомыкIым, газым афытемыгъэпсыхьэгъэ хьакур бгъэ­плъыныр;

— IугъоикIыпIэхэм ямыщыкIэгъэ пкъыгъохэр арыбгъэуцонхэр;

— хьакур лъэшыщэу бгъэ­плъы­ныр.

Тэрэзыджэ зекIуакIэр машIом къызэрэшъуфимыгъэгъущтыр зыщышъумыгъэгъупш. Урысые Федерацием ихэбзэгъэуцугъэ зэрэщыгъэунэфыгъэм тетэу машIом зыкъымыштэнымкIэ шапхъэхэр къыдилъытэнхэр хэти ипшъэрылъ. Шъо шъушъхьи, къышъупэблагъэхэми ящыIэныгъэ къырыкIощтыр бэкIэ къызэрэшъолъытыгъэр зыщышъумыгъэгъупш.

Кушъу Рустам.
Мыекъуапэрэ Мыекъопэ районымрэ мэшIогъэкIосэнымкIэ якъэралыгъо инспектор.