ЗэхъокIыныгъэхэр сыда зыфэIорышIэщтхэр?

2020-рэ илъэсым ищылэ мазэ и 1-м къы­ще­гъэжьагъэу Урысые Фе­дерацием транспорт амалхэр Къэралыгъо автоинспекцием зэрэ­­­щатхыщтхэ шIыкIэм зэхъокIыныгъэу фа­шIы­гъэ­хэм кIуачIэ яIэ хъу­гъэ. Нахь игъэ­кIо­тыгъэу ахэм шъуащыдгъэгъозэщт.

Номерхэр зытетхэгъэ гъучIыр

Джы зэрэщытыщтыр — автомобилым пылъыщт номерхэр автоинспекцием къыгъэнэфэщтых, ау ахэр зытетхэгъэ гъучI­хэр къаритыжьыщтхэп. Автомобилыр зием инспекцием къыри­тырэ тхылъхэм адиштэу номер­хэр зытетхэгъэ гъучIыр къыдэзыгъэкIырэ гупчэхэм къащищэфыщт. Ащ ишIуагъэкIэ МРЭО-м чэзыур нахь макIэ щыхъущт ыкIи ащ фэдиз тамыгъэхэу но­мерхэр зытетхэр инспекцием къыщэфынхэшъ, ыгъэтIылъынхэр ищыкIэгъэжьэп. Ау а пшъэ­рылъыр Къэралыгъо автоин­спекцием Iахыжьыпагъэу щытэп. Номер тамыгъэхэр аритынхэм ифитыныгъэ иI. Аущтэу ашIыныр къызхэкIыгъэр номерхэр къыдэзыгъэкIырэ коммерческэ ор­ганизациехэр зыдэщымыIэ темыр шъолъырхэу цIыф макIэ зыщыпсэухэрэр зэрэкIэлъэIу­гъэхэр ары.

Шъолъырым икод

Транспорт амалыр къэзыщэфыгъэр зыщыпсэурэм икод джы автомобилым къыфыпалъхьащтыр. Нахь къыжъугурыIоным пае, узыщыпсэурэ къалэм машинэ къыщыпщэфыгъэми, удэмытхагъэмэ, ащ икод къыуа­тыщтэп. Шъугу къэдгъэкIыжьын а шIыкIэр 1993 — 2013-рэ илъэсхэм зэрэщыIагъэр. Ушэтынхэм къызэрагъэлъэгъуагъэм­кIэ, ар зэрэщагъэзыягъэм инспекторхэм къиныгъохэр къа­фи­хьыгъ — «транзитчикхэр» ыкIи а шъолъырым щымыщхэр къыхэгъэщыгъуае мэхъу.

ШъунаIэ тешъодгъадзэ тшIои­гъу, шъолъыр пстэуми я Къэралыгъо автоинспекцие иотделение иучет машинэр хэбгъэуцон уфит, ау узыдэтхэгъэ чIыпIэр зыхэхьэрэ шъолъырым икод къыуатыщтыр.

Джащ фэдэу…

МашинакIэ къэзыщэфырэм автосалоным джы щаригъэтхын ылъэкIыщт. Ащ пае а салоным Къэралыгъо автоинспекцием къыритыгъэу фитыныгъэ иIэн фае. А шIыкIэм тет зыхъукIэ транспорт амалыр зием ыцIэкIэ дилерым лъэIу тхылъыр под­разделениеу зыщатхырэм егъэ­хьы, ищыкIэгъэ тхылъхэр зэкIэри еугъоих.

Автомобилэу зи VIN (транспорт амалым иидентификационнэ номер) къызэмыджэшъу­хэрэм шIокI имыIэу тамыгъэ (кузовым) полицейскэхэм джы тыратхэн фае. Ар машинэр зием имылъкукIэ зэшIуихын фае. Зэ ар зишIыкIэ екъу, уахътэ тешIагъэми, икIэрыкIэ уплъэкIунхэр къыхэхьажьхэрэп.

Транспорт амал зиIэм ыныбжь илъэс 16 мыхъугъэмэ джы тыратхэщтэп. Ащ фэдэ автомобилыр ны-тыхэм язырэм е зы­пIурэм тыратхэ. Ыныбжь зи­къукIэ, автомат шIыкIэм тетэуыпэрэ документыр зытхыгъэ органым зэпегъэушъ, зием ты­ратхэжьы.

Къэралыгъо тамыгъэу «Тран­зит» зыфиIорэр къыра­гъэжьэжьы. Ахэр зэратыщтхэ автомобильхэр охътэ гъэнэфагъэкIэ гъогурыкIоным хэлэжьэщтхэр ары.

ГущыIэм пае, къэралыгъом ишъолъыр ращыщт машинэхэр ыкIи ищэрэхъ шъо нэкIхэр къыдэзыгъэкIыжьыщтхэм анэзыгъэсыщтхэр. «Транзитыр» зытелъыр гъогурыкIоным хэлэжьэн зэрэфитыр мэфэ 30-м къыкIоцI.

Урысыем гъогурыкIоныр щы­нэгъончъэнымкIэ и Къэралыгъо автоинспекцие къызэрэщыхагъэщыгъэмкIэ, транспорт амалыр тхыгъэнымкIэ къэралыгъо фэIо-фашIэм изытет зыкъе­гъэIэтыгъэным хэбзэгъэуцугъа­кIэр фэIорышIэщт.

ЗыкI порталым ишIуагъэкIэ

Адыгэ Республикэм хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо автоинспекцие шъугу къегъэкIыжьы электроннэ шIыкIэм тетэу къэралыгъо фэIо-фэшIэхэр зэри­гъэцакIэхэрэр ыкIи а амалыр къызфэжъугъэфедэнэу къы­шъоджэ.

Ахэр: автотранспорт амалхэм ыкIи ахэм апыт прицепхэм ятхын, квалификационнэ эк­за­менхэм ятын, водительскэ удо­стоверениехэм якъыдэхын. Ащ пае къэралыгъо фэIо-фа­шIэ­хэм я ЗыкI порталэу www.go­suslugi.ru зыфиIорэм уехьэшъ, ищы­кIэгъэ ведомствэр ыкIи фэIо-фашIэр къыхэохы.

БэшIагъэу автомобилыр зезыфэхэрэм агу къэкIыжьын фае машинэр учетым хагъэуцоным пае чэзыум бэрэ зэрэхэтыщтыгъэхэр. Джы электроннэ шIыкIэм тетэу ЗыкI порталымкIэ чэзыум ухэуцон плъэкIыщт. Ащ пае а сайтым уихьанышъ, пцIэ, плъэ­къуацIэ иптхэнхэшъ, узыфэе уахътэр къыхэпхыщт.

Водительскэ удостоверениер зэблэпхъущтми е пшIокIодыгъэу къыдэпхыжьыщтми джа шIыкIэм фэдэу зэшIопхышъущт.

ГъогурыкIоным ишапхъэхэр зыукъуагъэу видеокамерэм къы­ридзагъэм административнэ та­зырэу тыралъхьагъэм икъэбар игъом зышIэнэу фаехэм къэралыгъо фэIо-фашIэхэм я ЗыкI портал зыщатхыщт, ащ дакIоу sms къафэкIоным кIэтхэщтых.

Мы фэIо-фашIэм ыпкIэ хэ­лъэп. ЗыкI порталым ишIуагъэ­кIэ, тазырэу къыптыралъхьа­гъэр игъом ппщыныжьын амал уиIэщт.

ЦIыфэу Интернет зимыIэм административнэ пшъэдэкIыжьэу телъыр зэригъашIэ шIоигъомэ, МФЦ-м а фэIо-фашIэр егъэцакIэшъ, ищыкIэгъэ къэбарыр къыраIощт.