Урысыем ипэрытхэр

Непэ къалэу Ростов-на-Дону зэнэкъокъоу «Лидеры России» зы­фи­Iо­рэм ишъолъыр финалныкъо къыщызэIуахыщт. Ащ Къыблэ феде­раль­нэ шъолъырым илIыкIохэр хэлэжьэщтых.

Лъэпкъ хъызмэтымкIэ ыкIи къэралыгъо къулыкъумкIэ Урысые академиеу УФ-м и Президент дэжь щылажьэрэм иIэпы­IэгъукIэ зэнэкъокъур зэхащэ.

Финалныкъом хэлэжьэнхэу къырагъэблэгъагъэх УФ-м и Президент иполномочнэ лIыкIоу Къыблэ федеральнэ шъолъырым щыIэм игуадзэу Владимир Гурба, Ростов хэкум игубернаторэу Василий Голубевыр, Лъэпкъ хъызмэтымкIэ ыкIи къэралыгъо къулыкъумкIэ Урысые академием иректорэу, зэнэкъокъоу «Лидеры России» зыфиIорэм игъэсакIоу Владимир Мау, Урысые къэралыгъо социальнэ университетым иректорэу, экономикэ шIэныгъэхэмкIэ док­торэу, зэнэкъокъум и Лъы­плъэ­кIо совет хэтэу Наталья Починок ыкIи автономнэ мысатыу организациеу «Россия — страна возможностей» зыфиIорэм игенеральнэ пащэ игуадзэу Александр Садовскэр.

Зэнэкъокъум хэлажьэ зы­шIоигъохэу Къыблэ федеральнэ шъолъырымкIэ лъэIу тхылъхэр къэзытхыгъэхэм япчъагъэ 20141-рэ мэхъу. Финалныкъом ахэм ащыщэу къырагъэблэгъагъэр 332-рэ. Ахэм зэпэчыжьэ уплъэкIунхэм яуцугъо шIэныгъэ анахь дэгъухэр къыщагъэлъэгъуагъэх. Зэфэхьысыжьэу ашIыгъэхэмкIэ, АдыгеимкIэ мы зэнэкъокъум хэлэжьэнэу нэ­бгырэ 11 а уцугъом къыщы­ха­хыгъагъ. Ростов хэкум — 101-рэ, Краснодар краим — 96-рэ, Волгоград хэкум — 39-рэ, Къырым — 28-рэ, Астраханскэ хэкум — 25-рэ, федеральнэ мэхьанэ зиIэ къалэу Севастополь нэ­бгырэ 22-рэ, Къалмыкъым нэ­бгыри 10 джащ фэдэу къащыхахыгъ.

Непэ ыкIи неущ зэнэкъокъум хэлажьэхэрэм япэрытныгъэ къаушыхьатын ыкIи финалым ихьанхэмкIэ зэнэкъокъунхэ фае. Ащ пае программэм къыды­хэлъытагъэх мастер-классхэмрэ узщыгупшысэн фэе джэгукIэ зэфэшъхьафхэмрэ. Мэзаем и 9-м пчыхьэм зэфэхьысыжьхэр ашIыщтых ыкIи Къыблэ федеральнэ шъолъырымкIэ финалым ихьагъэхэр къэнэфэщтых. Ахэр нэужым зэнэкъокъоу «Лидеры России» зыфиIорэм исуперфиналэу Шъачэ щыкIощтым къырагъэблэгъэщтых.

«ЗэкIэмкIи финалныкъо 11 щыIэщтыр. Ахэм ащыщэу 8-р шъолъырхэм ащыкIощт, 3-р —лъэныкъо хэхыгъэхэмкIэ. Шъо­лъыр финалныкъохэр къэралыгъом ишъолъыри 8-мэ зэкIэмэ мы илъэсым ищылэ-имэзэе мазэхэм ащырагъэкIокIыщтых, зэнэкъокъум илъэныкъуи 3-мкIэ гъэтхапэм Москва зыщаушэ­тыщт. Финалныкъо 11 пэпчъ нэ­­бгырэ 330-рэ фэдиз хагъэлэ­жьэщтыр. Мыхэм ахахьэрэп Гупчэ федеральнэ шъолъырыр — Москварэ Москва хэкумрэ къарыкIырэр зэрэбэдэдэм къы­хэкIэу ащ щыхагъэлэжьэщтыр нэбгырэ 664-рэ. Финалныкъом къырагъэблэгъэщт нэбгырэ 3399-м щыщэу суперфиналым нэбгырэ 300 ихьащтыр. Ахэм зэкIэми гъэсэныгъэ грантэу сомэ миллион аратыщт. Зэнэ­къокъум текIоныгъэ къыщыдэзыхыщтыр нэбгыри 100. Ахэм яегъэджэкIощтых къэралыгъом игъэIорышIэкIо анахь дэгъухэр», — къыIотагъ автономнэ мысатыу организациеу «Россия —страна возможностей» зыфи­Iорэм игенеральнэ пащэу, зэ­нэкъокъоу «Лидеры России» зыцIэм пэщэныгъэ дызезыхьэу Алексей Комиссаровым.

НэмыкI къэбархэу зэнэкъо­къум епхыгъэхэр сайтэу Ли­дерыРоссии.рф. ижъугъотэнхэ шъулъэкIыщт.