Щытхъур афаIо

Адыгэ Республикэм и Камернэ музыкальнэ те­атрэу Хьанэхъу Адамэ ыцIэ зыхьырэм пчы­хьэзэхэхьэ гъэшIэгъон щыкIуагъ.

Камернэ музыкальнэ театрэр 2019-рэ илъэсым театрэм и Илъэс зэрэхэлэжьагъэр зэфа­хьысыжьыгъ. Адыгэ Республикэм культурэмкIэ иминистрэу Аулъэ Юрэ Камернэ музыкальнэ театрэм къыщытхъугъ. Ми­нистерствэм ирэзэныгъэ тхылъхэр Екатерина Пигасовам, Ирина Минкарскаям, Тыгъужъ Сусанэ, Юлия Аксеновам, Светлана Корневам аритыжьыгъэх.

Адыгэ Республикэм изаслу­женнэ артистэу Александр Степановым ыныбжь илъэс 70-рэ зэрэ­хъугъэм фэшI Ю. Аулъэр фэ­гушIуагъ, министерствэм итын лъапIэу Теуцожь Цыгъо июби­лейнэ медаль фигъэшъошагъ.

Урысыем итеатрэхэм яIофы­шIэхэм я Союз икъутамэу Адыге­им щыIэм ипащэ игуадзэу ­Къуижъ Нэфсэт Адыгеим иартист цIэрыIоу Александр Степановым шIоу щыIэр къыдэхъунэу фиIуагъ, хэгъэгум итеатрэхэм яIофышIэхэм я Союз и Щытхъу тхылъ риты­жьыгъ.

Камернэ музыкальнэ театрэм ихудожественнэ пащэу, Урысыем, Адыгеим искусствэхэмкIэ яза­служеннэ IофышIэшхоу Сулейманов Юныс «Пшызэ театральнэр» зыфиIорэ фестивалым театрэр зэрэхэлэжьагъэм, артистхэр Къырым зэрэщыIагъэхэм, театральнэ едзыгъохэр къызэ­рагъэлъэгъуагъэхэм, Краснодар краим, Адыгэ Республикэм спек­таклэ пчъагъэ къызэрэщашIыгъэм къатегущыIагъ.

Театрэм и Илъэс шIэныгъэу щызэрагъэгъотыгъэр щыIэныгъэм щагъэфедэщт. Музыкальнэ теат­рэм икъэгъэлъэгъонхэм цIыфыбэ зэряплъырэр хэтэгъэунэфыкIы.

Александр Степановым къыфэгушIуагъэхэм «тхьашъуегъэпсэу» къариIожьыгъ, пшъэшъэ дахэм фэгъэхьыгъэ спектаклэм роль шъхьаIэр къыщишIыгъ. Артистхэу Ирина Криченкэм, Александр Степановым, Михаил Арзума­новым, Владислав Верещако, нэмыкIхэм залым чIэсхэр Iэгу афы­теуагъэх.

Адыгэ Республикэм изаслу­женнэ артистэу, оркестрэм ихудо­жественнэ пащэу Аркадий Хуснияровыр яIэшъхьэтетэу музыкантхэм орэдышъохэр агъэжъынчыгъэх. Апшеронскэ, Шытхьэлэ, Мыекъопэ, Кощхьэблэ районхэм къарыкIыгъэхэр, къалэу Мые­къуапэ дэсхэр ягуапэу къэгъэ­лъэгъоным еплъыгъэх. Театрэм лъэшэу фэразэх, щытхъур фаIо. Адыгэ Республикэм инароднэ артистэу, Грузием изаслуженнэ артистэу Исуп Аслъан къашъохэр ыгъэуцугъэх.

Сурэтхэр пчыхьэзэхахьэм къы­щытетхыгъэх.